Frantsııa parlamentinde NATO-dan shyǵý máselesi kóterildi

ASTANA. KAZINFORM — Frantsııa Ulttyq jınalysynyń (parlamenttiń tómengi palatasy) vıtse-prezıdenti Klemans Gette eldiń NATO-dan shyǵýyna qatysty rezolıýtsııa usyndy. Bul týraly Kazinform agenttiginiń menshikti tilshisi habarlady.

— Qazir Frantsııanyń NATO-ǵa múshe bolyp qalýy burynǵydan da mańyzdy másele bolyp otyr. NATO – AQSh basqaratyn jáne negizinen sol eldiń múddesine qyzmet etetin áskerı odaq. Sondyqtan men Frantsııany NATO-dan shyǵarý týraly rezolıýtsııa usyndym. Bul eń aldymen alıanstyń birikken áskerı basqarý júıesinen shyǵýdan bastalýy kerek, – dep jazdy Klemans Gette áleýmettik jelidegi paraqshasynda.

Frantsııadaǵy solshyl kúshterdiń ókili Klemans Gette AQSh-tyń Venesýela prezıdenti Nıkolas Madýroǵa qatysty áreketterin jáne Grenlandııany óz quramyna qosý jónindegi josparlaryn synǵa aldy. Sondaı-aq ol AQSh-tyń Gaza sektoryndaǵy qaqtyǵys kezinde Izraılge kórsetken qoldaýyna teris pikir bildirdi.

Bul ustanym Frantsııadaǵy «Baǵynbaıtyn Frantsııa» («La France insoumise») atty solshyl qozǵalystyń burynnan kele jatqan saıası baǵytyna saı keledi. Atalǵan qozǵalys 2022 jyly-aq NATO-ny «álemdegi jalǵyz biriktirilgen áskerı alıans» dep atap, «Qyrǵı qabaq soǵys aıaqtalǵannan keıin bul uıym taratylýy tıis edi» degen pikir aıtqan bolatyn.

Buǵan deıin Danııanyń premer-mınıstri Mette Frederıksen NATO-nyń bolashaqta ómir súrýin toqtatýy múmkin ekenin eskertken edi. Bul málimdeme AQSh basshylyǵynyń Grenlandııaǵa qatysty aıtqan sózderinen keıin jasalǵan.