Frantsııada jańa tabıǵat zańyna baılanysty ereýilder ótip jatyr

STRASBÝRG. QazAqparat – Osy aptada Frantsııanyń Strasbýrg qalasynda Eýroparlamenttiń kóshpeli sessııasy ótip jatyr, onda basqa zań jobalarynyń qatarynda «Tabıǵatty qalpyna keltirý týraly» zań qarastyrylýda, dep habarlaıdy QazAqparat tilshisi.

Bul zań jobasy Eýroparlamenttiń negizgi fraktsııalary arasynda birneshe aı boıy qyzý pikirtalas týdyrdy. Qarastyrylyp otyrǵan normalar 2030 jylǵa qaraı EO-da qurlyq pen teńiz betiniń kem degende 20% -yn tabıǵı kúıine qaıtarýdy, klımattyń ózgerýine qaýip tóndiretin bıoalýantúrlilikti saqtap, kóbeıtýdi zańdy túrde belgileıdi.

Zań sonymen qatar 2050 jylǵa qaraı hımııalyq pestıtsıdterdi qoldanýdy 50%-ǵa azaıtýdy qarastyrady.

Zań jobasy jasyl, ortalyq-solshyl Eýropalyq Parlament saıasatkerleri men ekologııalyq uıymdardyń qoldaýyna ıe boldy.

Alaıda, dál osy qujat Eýroodaqtyń birqatar saıası kúshteriniń qatty reaktsııasyn týdyrdy.

Osylaısha, hrıstıan demokrattary jáne basqa da ońshyl eýrodepýtattar nátıjesinde aýylsharýashylyq jerlerin qysqartýǵa, az ónim jınaýǵa, azyq-túlik qaýipsizdigi men fermerlerdiń ál-aýqatyna qaýip tóndirýge týra keletinin aıtyp otyr.

Seısenbide Strasbýrg qalasyndaǵy Eýropalyq parlament ǵımaraty aınalasyndaǵy qozǵalys jabyldy. Bul jerdi narazylyq bildirý úshin traktorlarymen kelgen frantsýz fermerleri jaýyp tastady.

Óz kezeginde ekologtar ózderiniń pıketterin Frantsııadaǵy Eýroparlament aldynda ótkizedi. Zań jobasyn qorǵaý úshin Strasbýrgke belgili belsendi Greta Týnberg arnaıy keldi.