Frantsııa fermerleri qystyń jyly bolǵanyna alańdap otyr

ASTANA. QazAqparat – Eýropa fermerleri men agronomdary jańa klımatqa beıimdelýge tyrysyp jatyr. Frantsııanyń ońtústik-batysynda qystyń jyly bolýy jergilikti jemis óndirýshilerge úlken másele týdyryp otyr, jemis aǵashtarynyń erte gúldeýi ónimniń búlinýine ákep soǵýy múmkin, dep habarlaıdy QazAqparat Euronews agenttigine silteme jasap.

«Eger aldaǵy birneshe aptada aıaz bastalsa, olardyń túsi men túıini búlinedi, saldarynan jazda jemis te bolmaıdy», - dep túsindirdi bıolog Benedıkt Venden.

Ol Bordo mańyndaǵy plantatsııada 2050 jyldyń aýa raıyna beıimdeletin sorttardy jasaý úshin jumys istep jatyr.

Klımattyń ózgerýine monıtorıng jasaıtyn Copernicus qyzmetiniń málimetinshe, Eýropa óz tarıhynda eń jyly qańtardy bastan ótkerdi.

2,2°C temperatýrasy keıingi 30 jyldyń ortasha kórsetkishinen asyp tústi.

Reseıdiń soltústigi, Aýǵanstan men Pákistanda qańtar ádettegiden sýyq boldy. AQSh-tyń shyǵysynda, Kanada men Eýropada temperatýra orta kórsetkishten joǵary boldy.

Meteorologtar men ekologtar polıýsterdegi teńiz muzdaryn baqylap otyr. Arktıkada qańtarda teńizdiń muz basqan betiniń aýmaǵy ortasha kórsetkishten 4%-ǵa tómen boldy.

Bul - baqylaý tarıhynda úshinshi ret tirkelgen eń tómengi kórsetkish.

Antarktıda aýmaǵynda ótken aıda teńiz muzynyń kólemi rekordtyq mólsherge azaıdy, 1991 jyldan bergi ortasha kórsetkishten 31%-ǵa tómendedi.

Eýropada jemisterdiń kóp túrine uzaq ári sýyq qys kerek. Klımattyń ózgerýi olardyń tabıǵı ósý protsesin buzady. Benedıkt Venden alma, shıe, órik pen shabdalyny zerttep, olardyń qaı túri jyly klımatqa jaqsyraq beıimdeletinin anyqtaýǵa tyrysyp jatyr.

Bul keshe ǵana bastalǵan másele emes: Eýropada qystaǵy ortasha temperatýra ótken ǵasyrdyń 50-jyldarynan kóterile bastady.

Boljam boıynsha, ol aldaǵy onjyldyqta da joǵarylaı beredi.

Kadr ız vıdeo/euronews.com