Frantsısk Mońǵolııaǵa sapar shekken alǵashqy Rım papasy boldy

ASTANA.QazAqparat – Rım Papasy Frantsısk Mońǵolııanyń astanasy Ulan-Batyrǵa bardy. El basshylyǵymen kezdesý kezinde ol sybaılas jemqorlyqtan aýlaq bolý jáne «Jer planetasyn qorǵaýdy dereý qolǵa alý mindettemesi» týraly aıtty, dep habarlaıdy QazAqparat Euronews-ke silteme jasap.

Rım Papasy Frantsısk Ulan-Batyrdaǵy alyp Sýhe-Batyr alańynda halyqpen kezdesti. 86 jastaǵy pontıfıktiń qurmetine saltanatty shara ótip, qurmetti qaraýyl sap túzedi.

Mońǵolııa prezıdenti Ýhnaagıın Hýrelsýh mártebeli meımandy qarsy alý úshin «deel» dástúrli kıimimen Shyńǵys hannyń qoladan jasalǵan alyp músininiń aldynan qyzyl kilem tóselgen uzyn baspaldaqpen tústi.

Bul - rım-katolık shirkeýi basshysynyń Qytaı men Reseı arasynda ornalasqan býddızmdi ustanýshylar basym elge jasaǵan alǵashqy sapary.

Keıinirek úkimet saraıynda Rım Papasy Frantsısk Mońǵolııanyń joǵary laýazymdy tulǵalaryna, sonyń ishinde Prezıdent pen Premer-Mınıstr Lývsannamsraı Oıýn-Erdenege úndeý joldady.