Fotoreportaj: Almatydaǵy Olımpıadaǵa daıyndyq ortalyǵynda qyzý daıyndyq júrip jatyr
ALMATY. KAZINFORM – Frantsııa astanasy Parıjde ótetin XXXIII jazǵy Olımpıada oıyndarynyń bastalýyna sanaýly kúnder qaldy. Qazaqstan óz táýelsizdigin alǵaly beri jazǵy dúnıejúzilik dodaǵa 8-ret qatysqaly otyr.
Otandyq sportshylar búginge deıin 25 sport túrinen 80 lıtsenzııa jeńip aldy. Olardyń birqatary «Almaty» olımpıadaǵa daıyndyq ortalyǵynda sheberlikterin shyńdaýda. Kazinform tilshisi aıtylǵan ortalyqqa baryp, tórt jyldyqtyń basty básekesine daıyndalyp jatqan sportshylardyń jaı-kúıimen tanysyp qaıtty.
Qazaqstandyq sportshylardyń bir toby Almatyǵa jaqyn mańda ornalasqan jańa Olımpıadaǵa daıyndyq ortalyǵynda oqý-jattyǵý jıyndaryn ótkizip jatyr. Munda olar úshin barlyq jaǵdaı jasalǵan – qajetti jabdyqtar men ınfraqurylym, qonaq úı, medıtsınalyq ortalyq bar. Qazirgi ýaqytta ortalyqta dzıýdoshylar, balýandar, jeńil atletter jáne mergender daıyndyqtan ótýde.
Dzıýdo
Parıjge tolyq quramda attanatyn boksshylardan keıin joldama sany boıynsha ekinshi turǵan – tatamı sheberleri. Bul sport túrinen 8 dzıýdoshy: erler 5 salmaqta, al áıelder 3 salmaqta el namysyn qorǵaıdy. Olar: Abıba Ábýjaqynova, Esmıgýl Kýıýlova, Kamıla Berliqash, Eldos Smetov, Ǵusman Qyrǵyzbaev, Danııar Shamshaev, Abylaıhan Jubanazar jáne Nurlyhan Sharhan.
- Daıyndyq joǵary deńgeıde ótip jatyr. 1-6 shilde aralyǵynda biz Ispanııada oqý-jattyǵý ótkizdik. Qaıtyp kelgennen keıin birden osy ortalyqqa keldik. Bul bizdiń Olımpıada aldyndaǵy sońǵy daıyndyǵymyz. Tálimgerlerimiz birneshe jyldan beri osy dodaǵa daıyndalyp keledi. Men olardyń júldeli oryndarǵa ıe bolatynyna senemin, oǵan ózderi de yntaly. Eń bastysy, olar ózderine senimdi bolsa, bári oıdaǵydaı bolady, - dedi Abylaıhan Jubanazar men Nurlyhan Sharhannyń jeke jattyqtyrýshysy Qalen Qalıuly.
Dzıýdoshylar Almatyda 17 shildege deıin oqý-jattyǵý jıyndaryn ótkizip, sodan keıin Frantsııaǵa attanady. Otandastarymyz aldymen, 1 aptadaı Meze qalasynda bolady. Eýropanyń aýa-raıy men ýaqytyna beıimdelgen soń Parıjge jol tartady.
24 jastaǵy Abylaıhan Jubanazar bıyl óz mansabyndaǵy alǵashqy Olımpıadaǵa barady. Ol 12 jasynda qazaqsha kúrespen shuǵyldana bastaǵan. Az ýaqytta shyńdalyp shyqqan jas sportshy Qalen Qalıulynyń kózine túsip, onyń shaqyrýymen 5 jyldan keıin dzıýdoǵa aýysqan. Dzıýdoshy qazirgi ýaqytta Olımpıada chempıony bolýdy armandaıdy.
- Kóńil-kúı keremet. Osy kúnderi biz qyzý daıyndyqtan ótip jatyrmyz. Bári jospar boıynsha júrýde. Qazir men artyq eshteńeni oılamaýǵa tyrysamyn. Eshqandaı stress joq, psıhologııalyq turǵydan daıynmyn. Buǵan deıin lıtsenzııa alý degen birinshi tapsyrmany oryndadym. Endi Olımpıada jeńimpazy atanýǵa tyrysamyn. Men jaı ǵana qatysýshy bolǵym kelmeıdi, altyn medal jeńip alyp, tarıhta óz atymdy qaldyrǵym keledi. Árıne, bul ońaı bolmaıdy, barlyq qarsylastar myqty. Dzıýdo jyl saıyn damyp keledi jáne básekelestik deńgeıi aıtarlyqtaı ósti. Biraq men bar kúshimdi salamyn jáne ózime senemin, – dedi ol.
Aldaǵy Olımpıda oıyndarynda 100 kelige deıingi salmaqta baq synaıtyn Nurlyhan Sharhan da tórt jyldyqtyń basty dodasyna arnalǵan daıyndyq jaqsy ótip jatqanyn aıtady. 24 jastaǵy dzıýdoshy sportpen 10 jasynda Qyzylorda qalasynda aınalysa bastaǵan.
- Úsh jylǵa jýyq ulttyq qurama sapynda Olımpıadaǵa daıyndaldym jáne kóptegen jarystarǵa qatysyp, óz reıtıngimdi kóterdim. Qazir júldeli orynǵa ıe bolý úshin kúndelikti daıyndalyp jatyrmyz. Qarsylastar myqty. Barlyǵy medal alǵysy keletini túsinikti, biraq bul jerde «baq shaba ma, bap shaba ma» degendeı sáttilik te ról oınaıdy. Men úshin Olımpıada – olımp shyńy. Bala kezimnen chempıon bolýdy armandadym, endi ózimdi kórsetetin ýaqyty keldi, – deıdi Nurlyhan Sharhan.
Talas pen tartysqa, básege toly jarystarǵa daıyndyq barysynda búgingi sportshylardyń psıhologpen jumys isteýi – álemdik tájirıbe. Sondyqtan ótken jyldan bastap Qazaqstan dzıýdo federatsııasy psıholog Ǵalııa Nurbekovamen birige jumys isteı bastady.
Mamannyń aıtýynsha, ótken jyly sportshylarmen aýqymdy jumys atqarylǵan. Olar AQSh, Reseı jáne Eýropa elderinde qoldanylatyn tehnologııalardy qoldana bastady. Atap aıtqanda, NLB (neırolıngvıstıkalyq baǵdarlamalaý) koýchıngi qoldanylady, bul – tabysqa jetýge múmkindik beretin ózin-ózi jetildirý ádisi.
- Men únemi dzıýdoshylardyń jattyǵýlaryna qatysyp, olardyń is-qımyldaryn muqııat qadaǵalaımyn. Keıin jeke jumys sessııasyn ótkizemin. Olardyń is-qımylynan qandaı ishki qaqtyǵystar bolyp jatqanyn túsinýge bolady. Dzıýdo – aýyr sport túri. Munda jarystar jıi ótedi, olar únemi óziniń úzdik ekenin dáleldeýmen júredi, al bul uzaq merzimdi stress. Mundaı stressti tek ishteı myqty adamdar ǵana jeńe alady. Qazir bizdiń basty mindetimiz – Olımpıada aldynda shamadan tys stress pen qobaljýdy boldyrmaý. Sondyqtan bizdiń jattyǵýlarymyz sportshylarymyzdyń kóńil-kúıin kóterý úshin mýzykanyń súıemeldeýimen ótedi, – dedi psıholog.
Olımpıada kezinde tatamı sheberleri 27 shilde men 3 tamyz aralyǵynda baq synaıdy.
Oq atý
Oq atýdan qazaqstandyq mergender Olımpıadanyń alty lıtsenzııasyn jeńip aldy. Bul elimiz úshin jańa rekord, buǵan deıin mergender 5 lıtsenzııa ala alǵan. Barlyq alty sportshy tórt jyldyqtyń basty básekesinde birinshi ret óner kórsetedi. Olar: Islam Sátbaev, Nıkıta Chırıýkın, Konstantın Malınovskıı, Aleksandra Le, Irına ıÝnýsmetova, Arına Altýhova.
Oq atýdan Qazaqstan quramasynyń bas bapkeri Olga Dovgýn álemdik jarys aldynda komandanyń daıyndyǵy týraly aıtyp berdi. Onyń aıtýynsha, sportshylar 22 shildege deıin oqý-jattyǵýda bolady da, ári qaraı Frantsııa astanasyna jol tartady.
- Jalpy, daıyndyq barysy óte jaqsy. Men jattyqtyrýshy retinde olardan jaqsy nátıje kútemin. Biz keminde fınalǵa shyǵýdy maqsat tutamyz. Árıne, eshteńeni boljaǵym kelmeıdi. Úsh jyl boıy biz olarmen kóp jumys jasadyq, bul bizdiń jasarǵan komandamyz. Barlyǵy chempıon bolýǵa umtylady, olardyń naqty maqsattary bar. Sondyqtan biz olarǵa úmit artamyz jáne senemiz», – dedi Olga Dovgýn.
Sondaı-aq quramanyń bas bapkeri bizdiń mergender úshin Ońtústik Koreıa, Qytaı, Úndistan, Japonııa, Germanııa, Anglııa jáne basqa da elderdiń ókilderi basty básekeles ekenin atap ótti.
Jeńil atletıka
Parıj tórinde 7 jerlesimiz jeńil atletıkadan júldege talasady. Jeńil atletıkada joldama alýdyń eki joly bar: biri – irikteý normatıvin oryndaý, ekinshisi – reıtıng arqyly ótý. Janna Mamajanova men Nora Djerýto irikteý normatıvin oryndap, lıtsenzııa aldy. Al Davıd Efremov, Nadejda Dýbovıtskaıa, Elızaveta Matveeva, Olga Safronova, Deızı Djepkemeı reıtıng arqyly Olımpıada oıyndaryna joldama aldy.
- Bul meniń alǵashqy Olımpıadam. Sondyqtan jaqsy kóńil-kúıdemin, biraq úlken jaýapkershilikti sezinemin. Ókinishke qaraı, ótken Olımpıadaǵa lıtsenzııa utyp ala almadym. Endi jaqsy nátıje kórsetýge daıynmyn. Men medal alǵym keledi. Ol jerge mindetti túrde myqty sportshylar barady, barlyǵy jeńiske jetkisi keledi, biraq men bar kúshimdi salamyn», – dep atap ótti Davıd Efremov.
Aıta keteıik, jeńil atletterdiń oqý-jattyǵý jıyndary 29 shildege deıin jalǵasady. Sodan keıin sportshylar Parıjge attanady.
Olımpıadaǵa daıyndyq ortalyǵy
Almaty mańyndaǵy Olımpıadaǵa daıyndyq ortalyǵy bıyl aqpan aıynda ashyldy. Munda sporttyń 23 túri – jeńil atletıka, aýyr atletıka, voleıbol, basketbol, gandbol, shaǵyn fýtbol, hokkeı, konkımen júgirý, sporttyq jáne kórkem gımnastıka, sadaq atý, sý sporty, boks, jekpe-jek óneri, kúrestiń barlyq túrleri boıynsha sapaly daıyndyqtan ótýge barlyq jaǵdaı jasalǵan. Sport ortalyǵynda bir mezette 2300 sportshy emin-erkin jattyǵý jasaı alady. Ortalyqtyń jalpy aýdany – 40 gektar bolsa, ǵımarattardyń jalpy kólemi – 130 881,45 sharshy metrge jetedi. Ortalyqtaǵy qonaq úıdiń 209 bólmesi 409 adamdy qabyldaı alady. Sondaı-aq stadıon syıymdylyǵy 6246 kórermenge deıin jetedi.
Eske salaıyq, buǵan deıin tórt jyldyq dodaǵa eń kóp joldamany Qazaqstannyń qaı óńiri jeńip alǵanyn jazǵan edik.
Sondaı-aq qazaq sportshylary Olımpıadada qandaı sport túrlerinen synǵa túsetinin jazǵanbyz.
