AQSh-ta Florıda shtatynyń tarıhyndaǵy eń úlken evakýatsııa bastaldy

ASTANA. KAZINFORM – AQSh-tyń Florıda shtatynyń gýbernatory Ron Desantıs jaqyndap kele jatqan «Mılton» daýylyna baılanysty shtat turǵyndaryn dereý evakýatsııalaýǵa shaqyrdy. Bul týraly The New York Times gazeti habarlady.

AQSh-tyń Tótenshe jaǵdaılardy basqarý jónindegi federaldyq agenttiginiń málimeti boıynsha, 5,5 mıllıonnan astam adamǵa mindetti nemese usynylǵan evakýatsııa týraly habarlamalar jiberilgen. Bul Florıda tarıhyndaǵy eń úlken evakýatsııa.

– Eger ketkińiz kelse, qazir ketińiz, – dedi gýbernator baspasóz máslıhatynda.

Ol sondaı-aq prezıdent Djo Baıdenniń shtat bıligi usynǵan barlyq sharalardy qoldaıtynyn jáne sý tasqynynyń saldarymen kúresýge AQSh Ulttyq gvardııasynyń 8 myńǵa jýyq qyzmetkeri jumyldyrylatynyn habarlady.

«Mılton» Meksıka shyǵanaǵynda 2005 jyldan beri baıqalǵan eń kúshti daýyl ekeni atap ótildi. Búgin, 9 qazanda ol 3,3 mıllıonnan astam adam turatyn Tampa-Beıge jetedi dep kútilýde. Sınoptıkter daýyldyń qaı jerde bolatynyn áli anyqtaǵan joq. Keshe, 8 qazanda Mıltondy AQSh-tyń Ulttyq daýyl ortalyǵy (NHC) ony 5-sanattaǵy daýyl dep rastady.

NHC málimetteri boıynsha, taıfýn saǵatyna 14,5 km jyldamdyqpen qozǵalady jáne jeldiń jyldamdyǵy saǵatyna 287 km-ge deıin jetedi. Daýyldyń Florıdaǵa jaqyndaýyna baılanysty 1500-den astam reıs toqtatyldy. Mıltonǵa arnalǵan eskertýler shtatta 277 adamnyń ómirin qıǵan «Helen» daýylynan bir aptadan keıin keldi.

Aıta keteıik, buǵan deıin «Mılton» daýylynyń saldary aýyr zardaptarǵa ákelýi múmkin ekenin jazǵan bolatynbyz.