Fızıka, hımııa mamandyqtaryn aqyly negizde oqyp jatqan stýdentterdiń memlekettik bilim grantyn alýǵa múmkindigi bar

ASTANA. QazAqparat - Fızıka, hımııa mamandyqtaryn aqyly negizde oqyp jatqan stýdentterdiń memlekettik bilim grantyn alýǵa múmkindigi bar. Bul týraly búgin Ortalyq kommýnıkatsııalar qyzmetindegi baspasóz máslıhatynda Qostanaı memlekettik pedagogıkalyq ınstıtýtynyń rektory Erkin Ábil málim etti, dep habarlaıdy QazAqparat.

«Bıylǵy jyldyń taǵy bir ereksheligi - memleket tarabynan fızıka, hımııa, ınformatıka jáne bıologııa mamandyqtaryna 1 myń grant aǵylshyn tilinde oqytýǵa bólindi. Onyń ishinde 253 talapker grant aldy. Al qalǵan 747 grant qazir aqyly túrde oqyp jatqan, 3 kýrsqa kóshken stýdentterge konkýrstyq negizde, aǵylshyn tilinen emtıhan tapsyrǵan jaǵdaıda beriledi», - dedi ol.

Jalpy onyń aıtýynsha, aǵymdaǵy jyly bilim granttaryn taǵaıyndaý barysynda pedagogıkalyq mamandyqtarǵa konkýrs joǵary bolǵan ári bul mamandyqtarǵa qujat tapsyrǵan «Altyn belgi» ıegerleriniń sany da arta túsken.

«Máselen shet tilderine 278, matematıkaǵa 96 «Altyn belgi» ıegeri qujat ótkizdi. Olardyń tarabynan qazaq tili men ádebıeti, hımııa, fızıka, bıologııa mamandyqtaryna da suranys joǵary boldy. Bıyl pedagogıkalyq mamandyqtarǵa konkýrs 1 orynǵa 3 talapkerden keldi», - dedi Erkin Ábil.

Rektordyń aıtýynsha, mektepke deıingi bilim berý, ınformatıka, áleýmettik pedagogıka syndy mamandyqtarǵa konkýrs tómen tirkeldi.

«Máselen qazaq bólimine mektepke deıingi bilim berý mamandyǵyna 1 orynǵa 2 talapker bolsa, orys bóliminde 1 orynǵa bir talapker ǵana boldy», - dedi ol.