Fitch Qazaqstannyń táýelsiz kredıttik reıtıngin BBB deńgeıinde rastady

ASTANA. KAZINFORM – Fitch Ratings halyqaralyq reıtıng agenttigi 2025 jylǵy 15 shildede Qazaqstannyń táýelsiz kredıttik reıtıngin «BBB» deńgeıinde rastady. Boljam – «Turaqty». Bul týraly QR Ekonomıka mınıstrligi habarlady.

Agenttik reıtıngti saqtaýdyń negizgi faktorlary retinde kelesilerdi atap ótti:

• QR Ulttyq qorynyń valıýtalyq aktıvteri men Ulttyq banktiń altyn-valıýta rezervterin qosa alǵanda, taza syrtqy aktıvterdiń joǵary deńgeıi;

• memlekettik qaryzdyń tómen deńgeıi;

• birtindep fıskaldyq shoǵyrlandyrý sharalary;

• qarjylandyrýdaǵy ıkemdilik;

• turaqty ekonomıkalyq ósim;

• qalypty geosaıası táýekelder.

Fitch sarapshylarynyń pikirinshe, Teńiz ken ornyn keńeıtý esebinen munaı óndirý kóleminiń artýy munaı baǵasynyń tómendeýiniń áserin edáýir óteıdi.

Sondaı-aq agenttik Salyq kodeksine júrgizilip jatqan reformalar orta merzimdi perspektıvada bıýdjettik tapshylyqty qysqartýǵa múmkindik beredi dep sanaıdy.

- Kepildendirilgen mindettemelerdi qosa alǵanda, memlekettik qaryzdyń JІÓ-ge qatynasy turaqty deńgeıde saqtalady dep boljanýda, - delingen aqparatta.

Bıýdjettik jáne kvazı-bıýdjettik qoldaý sharalary ekonomıkanyń shıkizattyq emes sektorynyń el ekonomıkasynyń qurylymyndaǵy turaqty úlesin qamtamasyz etip otyrǵany atap ótildi.

Sonymen qatar Fitch AQSh tarapynan engizilgen 25 paıyzdyq tarıfterdiń Qazaqstan ekonomıkasyna aıtarlyqtaı áseri bolmaıtynyn atap ótti. Bul eldiń syrtqy saýda qurylymynda AQSh-tyń úlesiniń tómendigimen baılanysty.

Agenttik sondaı-aq qaıtalama sanktsııalar táýekelin de tómen dep baǵalaıdy.

Aıta keteıik, Qazaqstan Islam damý bankinen $1,1 mlrd qarjy tartpaq.