Fınlıandııada týý kórsetkishi 250 jyldaǵy eń tómen deńgeıge tústi

ASTANA. KAZINFORM — 2024 jyly Fınlıandııada bala týý kórsetkishi báseńdep, sońǵy 250 jyldyń eń tómengi deńgeıine jetti, dep habarlaıdy AZERTADJ.

Agenttik málimetine qaraǵanda, ótken jyly elde 43 720 bala dúnıege kelgen.

Fınlıandııanyń Halyq federatsııasynyń zertteýshisi Katerına Golovınanyń aıtýynsha, negizgi sebepterge bala týýdy keıinge qaldyrý, bedeýlik deńgeıiniń ósýi jáne psıhoáleýmettik kedergiler jatady. Adamdar bolashaqqa senimsizdik, ekonomıkalyq daǵdarystar, soǵystar jáne klımattyq qaýip-qaterlerge baılanysty bala týýyn keıinge qaldyrady. Sonymen qatar, jeke qundylyqtar men qalyptasqan ómir saltyn joǵaltýǵa degen qorqynysh ta áser etedi.

Ǵalymdardyń pikirinshe, psıhıkalyq densaýlyq máseleleri de otbasy qurý múmkindigin tómendetedi. Depressııasy bar adamdarǵa seriktes tabý jáne bala týý qıynyraq bolady. Bilim deńgeıi tómen er adamdar kóp jaǵdaıda urpaqsyz qalyp jatsa, joǵary bilimdi áıelder kerisinshe balany jıi týady.

Helsınkı ýnıversıtetiniń zertteýshileri densaýlyq saqtaý, bilim jáne áleýmettik sala mamandyqtary otbasylyq ómirmen jaqsy úılesetinin atap ótti. Óner, gýmanıtarlyq ǵylymdar, jaratylystaný ǵylymdary, ınjenerııa jáne tómen bilikti IT salalarynda adamdardyń bala týý deńgeıi tómenirek kórinedi. Bul jumystyń turaqsyz bolýy men az tabysqa baılanysty desedi.

Sarapshylar aqshalaı tólemderdiń tek qysqa merzimdi áseri baryn aıtady. Eń mańyzdy sharalar retinde balabaqshanyń qoljetimdiligi, ıkemdi jumys sharttary jáne psıhıkalyq densaýlyqty qoldaýdyń keńeıýi sanalady.

Ǵalymdar bul úrdis jalǵasa berse, Fınlıandııada eńbek resýrstarynyń azaıýy, salyq túsimderiniń tómendeýi jáne zeınetaqy júıesine qysymnyń kúsheıetinin eskertedi.

Budan buryn Fınlıandııa segizinshi jyl qatarynan álemdegi eń baqytty el bolyp tanylǵanyn jazǵanbyz. Tıisti tizimde Danııa ekinshi, Islandııa úshinshi orynǵa jaıǵasty