Fınlıandııa alǵashqy kommertsııalyq spýtnıgin ǵaryshqa ushyrdy

ASTANA. QazAqparat - Fınlıandııada qurastyrylǵan alǵashqy kommertsııalyq spýtnık Úndistannyń ońtústik-shyǵysyndaǵy Satısh Dhavan atyndaǵy ǵarysh aılaǵynan ushyryldy, dep habarlaıdy Azertadj agenttigi Yle-ge silteme jasap. 

Spýtnıkti qurastyrǵan Iceye kompanııasynyń qarjy dırektory Pekka Laýrılanyń sózine qaraǵanda, jospar boıynsha bıyl taǵy eki osyndaı ǵarysh apparaty orbıtaǵa shyǵarylady.

«Sodan keıin ondaǵan spýtnıktermen naǵyz kommertsııalyq qyzmetti júrgizemiz», - deıdi Pekka Laýrıla.

Massasy jetpis kılogramm keletin radıolokatsııalyq spýtnık derekterdi Jerge aýa raıynan jáne táýlik ýaqytynan táýelsiz túrde jetkize alady. Onyń sıgnaldaryna eń aldymen keme qatynasy salasy qajettilik sezinip otyr.

Byltyr sáýir aıynda AQSh-tan Aalto-2 alǵashqy shaǵyn spýtnıgin ushyrǵan Fınlıandııa ǵaryshtyq derjavaǵa aınaldy. 2018 jylǵy 12 qańtarda el prezıdent Saýlı Nıınıste ǵarysh týraly Fınlıandııa tarıhyndaǵy alǵashqy zańǵa qol qoıdy.