Fınalǵa shyqsaq qatarymyzǵa Ulttyq qurama boksshylaryn tartpaqpyz- «Astana arlandarynyń» bapkeri
- Nurlan Sákenuly erteń Qostanaı tórinde shákirtterińiz Ulybrıtanııanyń «British Leonhearts» komandasymen jartylaı fınaldyq kezdesýdiń alǵashqy aıqastaryn ótkizbek. Daıyndyqtaryńyz qalaı?
-Daıyndyǵymyz óte jaqsy. Boksshylarymyz burynnan osy jobada júrgen tájirıbeli. Sondyqtan tek shákirtterimnen jeńis kútip otyrmyn. 49 kelide Ermek Mádıev, 56 kelide Іlııas Súleımenov, 64 kelide Dilmurat Mıjıtov, 75 kelide ózimniń tól shákirtim Ábilhan Amanqul bar. Al 91 kelide jergilikti boksshy Anton Pınchýk el namysyn qorǵaıdy. Pınchýk óz jerlesteri aldynda baryn salam dep otyr.
-Qarsylastaryńyz týraly ne bilesizder?
-Biz qarsylastarymyzdy jaqsylap zerttedik. Olardyń úsheýi taza aǵylshyn, ekeýi legıoner boksshy eken. Sonyń ishinde 49 keli men 64 keli salmaqtaǵy boksshylary ǵana tájirıbeli kórindi bizge. Al qalǵan úsh salmaqtaǵy boksshylarynan erekshe bir keremetti ázirge baıqaı almadyq.
-Buıyrsa oısyrata jeńemiz dep josparlap otyrsyzdar ǵoı?
- Sport sondaı maqsatpen ǵana órleıdi. Óz basym aldyn ala boljam jasaǵandy asa qalamaımyn. Biraq, shákirtterim shetinen jeńiske laıyq dep esepteımin. Olar jattyǵýdy óte tyńǵylyqty, qulshynyspen jasady. Barlyǵy da jeńis úshin judyryqtasady.
-Osydan biraz ýaqyt buryn «Arlandarǵa» Ulttyq quramanyń boksshylary kómekke kelýi múmkin degen aqparattar estip edik...
-Iá, ondaı josparlar bolǵan. Biraq, ázirge naqtyly belgisiz. Basshylyq Ulttyq quramanyń bas bapkeri Myrzaǵalı Aıtjanovqa: «Alda álem birinshiligi jaqyndap keledi. Arlandarǵa boksshylaryńdy beremin dep júrgende, olar oılamaǵan jerden jaraqat alyp qalyp, álem birinshiliginen qalyp qoımańdar», dep eskertipti. Biz jartylaı fınaldyń alǵashqy jáne qarymta kezdesýinde taza óz boksshylarymyzdy synǵa salamyz. Eger, Alla qalap, fınalǵa shyǵyp jatsaq qana Ulttyq quramadan kómek suraýymyz múmkin.
-Eger fınalǵa shyqsańyzdar qaı komanda qarsylas bolýy múmkin?
- Ekinshi topta Kýba men Kolýmbııa arasyndaǵy jeńimpaz komandamen shyǵamyz. Kýbany jaqsy bilesizder, óte myqty komanda. Al Kolýmbııa da osal emes. Buıyrtqanyn kóremiz.
- Bıylǵy maýsymda tóreshiler jaǵynan bura-tartýshylyqtyń qurbany bolǵan kezderińiz boldy ma?
- Ondaı-ondaı sportta kóp kezdesedi. Biraq, osy jobaǵa qatysqan alǵashqy jyldardan beri qaraı tóreshiler qandaı qysym jasasa da júldegerler qatarynan qalyp kórgen emespiz. Eki ret chempıon atandyq. Bıylda sol jetistikti qaıtalaǵymyz keledi. Jalpy, aǵylshyndar óz jerinde ótetin jarystarda buratartýshylyqty kóp jasaıdy. Sondyqtan erteńgi jarysta barynsha aıqyn basymdyqpen utýymyz kerek. Erteńgi aıqas fınalǵa shyǵýǵa jol salatyn basty qadam.
-Áńgimeńizge rahmet! Sáttilik tileımiz...
