Fın kompanııalary Qazaqstanda ókildik ashyp, Ortalyq Azııa naryǵyna shyǵa alady
ASTANA. KAZINFORM – Elordada Qazaqstan-fın saýda-ekonomıkalyq yntymaqtastyq jónindegi komıssııasynyń 13-shi otyrysy aıaqtaldy. Ótken jyly eki el arasyndaǵy taýar aınalymy 208 mıllıon dollarǵa jetken.
Óz sózinde QR Ekologııa jáne tabıǵı resýrstar vıtse-mınıstri J. Álıev Qazaqstan Fınlıandııany Soltústik Eýropa óńirindegi negizgi áriptes retinde qarastyratynyn atap ótti.
«Biz ekijaqty qatynastardyń barlyq spektri boıynsha ózara is-qımyldy odan ári arttyrýǵa múddelimiz. 2023 jyly bizdiń elder arasynda ekijaqty taýar aınalymy aldyńǵy jylmen salystyrǵanda 3 paıyzǵa ósip, 208 mıllıon dollardy qurady. Qazaqstan Respýblıkasynan Fınlıandııaǵa eksport 3 mln dollardy, Fınlıandııadan Qazaqstan Respýblıkasyna ımport 205 mln dollardy qurady», - dedi vıtse-mınıstr komıssııa otyrysynda.
Onyń aıtýynsha, 2005 jyldan 2023 jyldyń 3-toqsany aralyǵyndaǵy Fınlıandııadan Qazaqstan Respýblıkasyna tikeleı ınvestıtsııanyń jalpy aǵyny 409,5 mıllıon dollardy, al 2023 jyly – 11,6 mıllıon dollardy qurady.
«Elimiz ınvestıtsııalyq ahýaldy jaqsartý boıynsha turaqty jumys júrgizip jatyr jáne ınvestorlar úshin jaqsy jaǵdaı jasalǵan. Sonymen qatar, Qazaqstan iri ónerkásiptik kásiporyndar men halyqaralyq korporatsııalardy elge kóshirý sharalaryn belsendi júzege asyrýda. Osyǵan baılanysty Qazaqstandaǵy bıznes-klımattyń dáıekti jaqsarýy aıasynda fın bıznesi Ortalyq Azııa óńiriniń naryǵyna shyǵý múmkindigi men kóshý úshin jańa platforma ala alady. Joǵaryda aıtylǵandardy eskere otyryp, fın kompanııalaryn Qazaqstanda óz ókildikterin ashýǵa shaqyramyz», - dedi Jomart Álıev.
Aıta keteıik, sheteldik delegatsııa quramynda Fınlıandııanyń teń tóraǵasy-Fınlıandııanyń syrtqy saýda jáne damý mınıstri Vılle Tavıo, Fınlıandııa SІM Reseı, Shyǵys Eýropa jáne Ortalyq Azııa departamenti dırektorynyń orynbasary Mıkko Kıvıkoskı, Fınlıandııa Geologııalyq qyzmetiniń Bas dırektory Kımmo Tıılıkaınen bar.
Otyrys barysynda ekijaqty yntymaqtastyqty odan ári nyǵaıtý jáne keńeıtý boıynsha keń aýqymdy máseleler talqylandy. Ónerkásip, bilim berý, kólik, energetıka, sondaı-aq orman sharýashylyǵy salalaryndaǵy ózara is-qımyldyń qazirgi jáne perspektıvalyq baǵyttary qaraldy.
