Fılıppındegi taıfýn: 60-tan astam adam qaza tapty

ASTANA.KAZINFORM — Bıylǵy jyldyń eń qýatty taıfýndardyń biri Fılıppın ortalyǵyna soqqy bergendikten, 66 adam qaza taýyp, júz myńdaǵan adam úıin tastap ketýge májbúr boldy, dep habarlaıdy BBC.

«Kalmaegı» taıfýny saldarynan halyq tyǵyz ornalasqan Sebý aralynyń ortalyq bóligindegi tutas qalalardy sý basty, onda qutqarýshylar 49 adamnyń qaza tapqanyn habarlady. Taǵy 26 adam áli iz-túzsiz joǵalyp ketken, dep habarlady azamattyq qorǵanys qyzmetkeri jergilikti BAQ-qa.

Resmı túrde rastalǵan qurbandar arasynda Sebýdiń ońtústigindegi Mındanao aralynda apatqa ushyraǵan áskerı tikushaqtyń alty ekıpaj múshesi bar. Ol qutqarý jumystaryna qatysý úshin jiberilip, seısenbi kúni Agýsan-del-Sýr aýdanynda apatqa ushyrady. Bul operatsııaǵa qatysqan tórt tikushaqtyń biri.

— Tikushaqpen baılanys úzildi, izdeý-qutqarý operatsııasy dereý bastaldy, — dep málimdedi Fılıppın áýe kúshteriniń baspasóz hatshysy.

Keıinirek Fılıppın áýe kúshteriniń ókili ushqysh pen ekıpaj músheleri bolýy múmkin dep boljanǵan alty adamnyń denesi tabylǵanyn málimdedi.

Taıfýn seısenbi kúni tańerteń jaǵalaýǵa jetkennen keıin azdap álsiredi, biraq áli de 130 km/saǵ jyldamdyqpen soǵyp tur.

Ol aptanyń ortasyna deıin Vısaı araldaryna jetip, keıin Ońtústik Qytaı teńizine qaraı jyljıdy dep boljandy.

Sebý turǵyndary sý tasqynynyń aýyr zardaptarynan áli es jııa almaı jatyr. Ulttyq apattardy basqarý agenttiginiń málimeti boıynsha, apat saldarynan 400 myńnan astam adam basqa jerge kóshirildi.

Feısbýktegi jazbasynda Sebý gýbernatory Pamela Barıkvatro apatty «buryn-sońdy bolmaǵan apat» dep atady.

— Biz negizgi qaýip jelde dep oıladyq, biraq shyn máninde sý tasqynynan qoryqpasa bolmaıdy eken. Sý tasqyny óte aýyr, — dedi ol.

Seısenbi kúni keshke Barıkvatro zardap shekkenderge kómek kórsetýdi jedeldetý úshin Sebýde tótenshe jaǵdaı jarııalady.

Jergilikti BAQ-tyńń habarlaýynsha, zardap shekkenderdiń kópshiligi sýǵa batyp ketken. Taý etekterinen laıly sý aǵyp, qalalar men aýyldarǵa tasyp, jolyndaǵynyń bárin shaıyp ketken.

Sebý turǵyn aýdandaryndaǵy shyǵyn kólemi óte joǵary dep baǵalandy: kóptegen shaǵyn ǵımarattar qırady, sý tasqyny qaıtqannan keıin kóshelerdi qalyń balshyq qabatymen basyp qaldy. Qutqarýshylar úılerinde qamalyp qalǵan adamdarǵa jetý úshin qaıyqtardy paıdalandy.

Ragasa taıfýny Fılıppınge osy jyldyń qyrkúıek aıynda da soqqy bergen bolatyn. Ol kezde de myńdaǵan turǵyn evakýatsııalanǵan.

Buǵan deıin Vetnamdaǵy «Matmo» taıfýny elge 330 mln dollardan astam shyǵyn keltirgenin habarlaǵan edik.