Feık: Qazaqstannyń jerleri qytaılyq saıttarda satylady

ASTANA. QazAqparat - Facebook-te Qytaıdyń ınternet-alańdarynda qazaqstandyq aýyl sharýashylyǵy alqaptary ashyq satylyp jatqany týraly aqparat jarııalandy. Ony Aýyl sharýashylyǵy mınıstrligi joqqa shyǵardy, dep habarlaıdy QazAqparat.

Stopfake.kz saıtyna AShM Jer resýrstaryn basqarý komıtetiniń tóraǵasy Murat Temirjanov jelide taralǵan qazaqstandyq jerlerdiń satylýy týraly aqparat shyndyqqa janaspaıtynyn aıtty.

«Qazaqstan Respýblıkasy Jer kodeksiniń 24-babynyń talaptaryna sáıkes, sheteldikter, azamattyǵy joq adamdar, sheteldik zańdy tulǵalar, sheteldik qatysýy bar Qazaqstan Respýblıkasynyń zańdy tulǵalary, halyqaralyq uıymdar, halyqaralyq qatysýy bar ǵylymı ortalyqtar, sondaı-aq qandastar aýyl sharýashylyǵy maqsatyndaǵy jer ýchaskelerin jeke menshik nemese jer paıdalaný quqyǵymen ıelene almaıdy, ıaǵnı aýyl sharýashylyǵy maqsatyndaǵy jer ýchaskelerin sheteldikterge berýge qatań tyıym salynǵan. Sonymen qatar, aýyl sharýashylyǵy maqsatyndaǵy jer ýchaskelerin sheteldiktermen nemese azamattyǵy joq adamdarmen nekede turǵan (erli-zaıypty) Qazaqstan Respýblıkasynyń azamattaryna jeke menshikke jáne jer paıdalaný quqyǵymen berýge jol berilmeıdi.

Áleýmettik jelide jarııalanǵan Qytaı eliniń saıtyndaǵy Qazaqstan aýmaǵyndaǵy jerlerdiń satylatyndyǵy týraly aqparat jalǵan ekendigin málimdeımiz», – dep jazdy ol óziniń Facebook paraqshasynda.