Feık-aqparat: Búkil álemde jaryq óship, tártipsizdik ornaıdy
Áleýmettik jelilerde «álemdik úkimettiń» jańa jospary talqylanýda. Paıdalanýshylardyń pikirinshe, jaqyn arada búkil álemde elektr qýaty óship, tártipsizdik ornaıdy. Bul týraly Dúnıejúzilik ekonomıkalyq forýmnyń negizin qalaýshy Klaýs Shvab málim etken-mys.
stopfake.kz-tiń jazýynsha, shyn máninde, Shvab osy jáne ártúrli elderdiń úkimetterinde mundaı josparlardyń bar ekendigi jaıly eshteńe aıtpaǵan. Bul teorııanyń «dáleli» retinde usynylatyn Klaýs Shvabtyń sózi is júzinde onyń Cyber Polygon 2020-da sóılegen sózinen alynǵan úzindi. Bul túrli salanyń mamandary men halyqaralyq uıymdardyń ókilderi sóz sóıleıtin korporatıvtik tehnıkalyq komandalarǵa arnalǵan kıberqaýipsizdik boıynsha jyl saıynǵy is-shara. Onyń basty taqyryby «Tsıfrlyq pandemııa: daǵdarystyń aldyn alý jáne barlyq deńgeıdegi kıberqaýipsizdikti nyǵaıtý» boldy.
«Іs-shara aıasynda sóılegen sózinde Klaýs Shvab álem ekonomıkasyna aıtarlyqtaı áserin tıgizetin kıber-shabýylǵa tap bolýy múmkin ekendigi jaıly oı qozǵaıdy. Buǵan jol bermeý úshin adamdarǵa qazirdiń ózinde táýekelderdi baǵalap, osyndaı jaǵdaılarmen kúresý úshin strategııalar ázirleý qajettigi aıtyldy. Cyber Polygon naq osy maqsatta uıymdastyryldy.
Teorııanyń tolyq túsindirmesin jáne yqtımal kıbershabýylǵa daıyn bolýdyń nelikten mańyzdy ekendigi jaıly Dúnıejúzilik ekonomıkalyq forýmnyń veb-saıtynan oqýǵa bolady», - delingen saıtta.
Málim etilgendeı, bıyl Cyber Polygon is-sharasy 9 shildede ótedi. Onyń barysynda jetkizý tizbegine jasandy shabýyl uıymdastyrylady. Al mamandar oǵan barynsha tez jáne tıimdi toıtarys berýi kerek.
«Osylaısha, Cyber Polygon – bul tek oqý-jattyǵýlar ǵana, al Klaýs Shvabtyń sózderi yqtımal qaýipke jatady jáne qandaı da bomlasyn úkimettiń jospary emes. Oqý-jattyǵýlar aıasynda elektr qýatyn qasaqana óshirý jáne álemde tártipsizdik ornatý stsenarııleri qarastyrylyp otyrǵan joq», - dep qorytyndy shyǵarady stopfake.kz.
