Fermerler úshin blokposttardan ótý rejımi qalaı iske asyrylady
Birinshi vıtse-mınıstrdiń aıtýynsha, QR Premer-Mınıstriniń blokposttarda fermerlerdiń júrip-turýyn jedel sheshý týraly bergen tapsyrmasyna qaramastan, kóptegen sharýashylyq ıeleri mınıstrlikke ruqsat alý tártibi boıynsha habarlasýda.
«Bul másele birneshe ret qaraldy, QR Prezıdenti, Premer-Mınıstr kóktemgi egis jumystaryn júrgizýge barlyq jaǵdaı jasaýda, onyń ishinde fermerler men servıstik uıymdardyń kedergisiz qozǵalysyn qamtamasyz etýdi tapsyrdy. Bul másele Memlekettik komıssııanyń kún tártibinde. Eń bastysy - Prezıdenttiń tapsyrmasy bar. Fermerlerge kedergi jasaýdyń qajeti joq. Kim elektrondy túrde jumys istegisi kelse, solaı jasasyn. Birinshiden, fermerlerdiń ótinishteri jedel qaralýy kerek, ıaǵnı 2-3 kúnge sozbaı. Sonymen qatar, ruqsatty qalaı alý kerektigin naqty túsindirip, fermerlerge tıisti jaǵdaı jasaý qajet. Eger elektrondy ruqsat bolmasa, aýylsharýashylyq taýar óndirýshileriniń qaǵaz anyqtamalary negizinde jasalsyn», - dedi Aıdarbek Saparov.
QR ІІM Ákimshilik polıtsııa komıtetiniń tóraǵasy Murat Baımuqashev fermerlerdi ótkizý pýnktterinen ótý tártibi týraly habarlady. Baqylaý-ótkizý pýnktterinde barlyq aqparat planshet bazasyna júktelgen. Tipti fermerdiń júk kóligi týraly aqparat bazaǵa enbegen jaǵdaıda, aýylsharýashylyq ónimin óndirýshi degen qujaty bolsa jetkilikti ekenin aıtty.
«Árbir qyzmetkerge kóktemgi dala jumystaryn júrgizýdiń mańyzdylyǵy men kóktemgi egis jumystaryna kedergi keltirgen jaǵdaıda qandaı saldary bolatyny aıtyldy. Bul másele erekshe baqylaýǵa alyndy. Eger sharalarǵa qatysty aqparat polıtseıdiń planshetinde joq bolsa, biraq fermerdiń qolynda anyqtamasy bolsa, bul jetkilikti, eshqandaı suraqtardyń qajeti joq», - dep atap ótti M.Baımuqashev.
Sondaı-aq, ІІM-niń ókili oblys ákimdikterine saıajaı turǵyndarynan shekteýlerdi alyp tastaý múmkindigin qarastyrýdy usyndy.
«Saıajaılar boıynsha suraqtar kóp kelip túsýde. Osy sanattaǵy adamdardy anyqtap, qabyldanǵan sharalardy polıtsııaǵa jetkizýge bolady. Eger múmkindik bolsa, saıajaılar boıynsha shekteý, tym bolmasa ýaqytsha bolsyn alyp tastalsa. Buǵan nazar aýdarýlaryńyzdy suraımyn», - dedi ol oblys ákimderiniń orynbasarlaryna qarata aıtqan sózinde.
Keńes qorytyndysy boıynsha Aýyl sharýashylyǵy birinshi vıtse-mınıstri Memlekettik organdardyń ókilderine fermerlerdiń júrip-turýyna kedergiler keltirmeý jóninde ótinish bildirdi.
«Kóktemgi egis naýqanyna maýsymdyq jumysshylar kóp tartylady. Olardyń barlyǵyn bazaǵa engizgenshe, ýaqyt ketedi. Qazir eń bastysy – ár kúndi tıimdi paıdalanyp, egisti egý. Búkil respýblıka kóleminde egis jumystary qarqyndy júrgizilýde. Elimiz úshin eń mańyzdy naýqanǵa kedergi keltirmeńizder, týyndaǵan barlyq máselelerdi jedel sheshýdi suraımyn», - dep túıindedi Aıdarbek Saparov.
Esterińizge salsaq, koronavırýs pandemııasy kezeńinde aýyl sharýashylyǵy ónimderin óndirýshilerdiń júrip-turýy boıynsha biryńǵaı algorıtm ázirlendi. Ol 2020 jylǵy 17 sáýirdegi Memlekettik komıssııa otyrysynda maquldandy. Bas sanıtarlyq dárigerdiń qaýlysymen aýyl sharýashylyǵy jumystaryn júrgizý kezinde fermerler men kóktemgi egis naýqanyna qatysty basqa da adamdardyń jáne olardyń jeke kólikterine kedergisiz júrip-turý quqyǵy berilgen bolatyn.