Federatsııadan jaýap alamyz - Mınıstrlik Arman Jumageldıevtiń boksshylarǵa aqsha taratýyna qatysty
«Mádenıet jáne sport mınıstrligi bokstan ulttyq quramanyń daıyndyq jıyndaryna jáne halyqaralyq jarystarǵa qatysýyna 2019-2021 jyldary respýblıkalyq bıýdjetten 1,5 mlrd teńge bóldi», - dep jazylǵan vedomstvo saıtynda.
Mınıstrliktiń málimeti boıynsha, túrli halyqaralyq jarystar men Olımpıada oıyndaryndaǵy jeńisine, sonyń ishinde álem chempıonattarynda mynadaı mólsherde aqshalaı tólemder qarastyrylǵan:
1-oryn úshin 15 000 AQSh dollary;
2 oryn úshin 7 000 AQSh dollary;
3-oryn úshin 5 000 AQSh dollary.
Al olardyń jattyqtyrýshylaryna kelesi mólsherde:
1-oryn úshin 10 000 AQSh dollary;
2 oryn úshin 5 000 AQSh dollary;
3-oryn úshin 3 000 AQSh dollary qarastyrylǵan.
«QR Dene shynyqtyrý jáne sport týraly» Zańyna sáıkes, Qazaqstan boks federatsııasy Belgrad (Serbııa) qalasynda sportshylardy daıyndaýǵa, bokstan qazaqstandyq delegatsııany basqarýǵa jáne súıemeldeýge jáne olardyń kommýnıkatsııasyna jaýap beredi.
Ulttyq quramanyń jekelegen boksshylaryna aqsha berý – bul federatsııa men mınıstrliktiń resmı tulǵasy bolyp sanalmaıtyn azamattyń jeke bastamasy. Qazir Serbııada Qazaqstan boks federatsııasynyń basshylyǵy men jattyqtyrýshylar quramy bar. Olarǵa mınıstrlik atalǵan fakti boıynsha túsinikteme alý úshin resmı suraý jiberdi.
Qazaqstan Respýblıkasy Mádenıet jáne sport mınıstrligi tarapynan Qazaqstan Respýblıkasynyń Ulttyq Olımpıada komıtetimen birlesip bokstan ulttyq qurama komandalardyń sportshylaryn sapaly daıarlaý úshin barlyq jaǵdaı jasalǵan», - delingen resmı málimette.
Eske salsaq, áleýmettik jelide shetelde júrgen qazaqstandyq Arman Jumageldıevtiń Serbııadaǵy Álem chempıonatyna qatysyp jatqan boksshylarǵa aqsha taratqany týraly vıdeo paıda boldy.
