Farıza Ońǵarsynovanyń shyǵarmashylyǵyna arnalǵan ádebı-sazdy kesh ótedi
Osy bir eske alý sharasyn Astana ákimdigi Memlekettik akademııalyq fılarmonııasynyń halyq aspaptary orkestri uıymdastyryp otyr.
Astana ákimdigi Memlekettik akademııalyq fılarmonııasynyń bas dırektory jáne kórkemdik jetekshisi Sáken Ábdirahmanovtyń aıtýynsha, Farıza Ońǵarsynovany eske alý keshi 2019 jylǵy eń alǵash ótkeli turǵan mańyzdy is-shara. «Qazaq poezııasynyń jaryq juldyzy Farıza Ońǵarsynovaǵa degen halyqtyń qurmeti erekshe. Týǵan halqyna qaldyrǵan jyr murasyn máńgilik sarqylmaıtyn óte baı qazyna, ulttyq qundylyq desek, qatelespeımiz. Bıyl týǵanyna 80 jyl tolýyna oraı ádebı-mýzykalyq kesh ótkizip, aqyn murasyn nasıhattaýǵa az da bolsa úlesimizdi qosqaly otyrmyz. Farıza aqynnyń jyrlary árbir qazaqtyń janyna jaqyn, júrekterinde jattalyp qalǵan. Ár adam aqynnyń ór rýhty óleńderinen qýat alady. Astana fılormonııasynyń ónerli ujymy kórermender kóńilinen shyǵatyn kontsert daıyndap otyr. Jańa ánder de, kúıler de oryndalady»,- dedi Sáken Ábdirahmanov.
Belgili óner sheberleriniń qatysýymen ótetin bul keshte Farıza Ońǵarsynovanyń sózine jazylǵan birqatar kompozıtorlardyń ánderi oryndalady. Sonyń ishinde Astana Memlekettik akademııalyq fılarmonııasy halyq aspaptary orkestriniń kórkemdik jetekshisi ári bas dırıjeri, Qazaqstannyń eńbek sińirgen qaıratkeri, professor Aıtqalı Jaıymovtyń «Mahabbat oty sónbeıdi», «Jyloıǵa sálem», «Atyraý - ánim» atty úsh áni shyrqalady. Sonymen qatar kompozıtor Áset Beıseýovtiń de aqyn sózine jazylǵan «Qımastarym» áni kesh baǵdarlamasyna engen.
F.Ońǵarsynovanyń sózine jazylǵan kompozıtor Dına Ámirovanyń «Sonda da áli tirimin» áni alǵash ret oryndalmaqshy.
Sondaı-aq bir ereksheligi, osy keshtiń baǵdarlamasynda Farızaǵa arnalǵan kúı de, án de bar. Kompozıtor, Mádenıet qaıratkeri Nurlan Bekenovtiń jýyrda dúnıege kelgen «Tolǵam» atty kúıi tuńǵysh ret kórermen nazaryna usynylady.
Atyraý qalasynyń turǵyny, kompozıtor Amankeldi Sultanǵalıdyń Farıza Ońǵarsynovaǵa arnalǵan «Meıirimdi jan edi» áni de alǵash ret oryndalady. Sózin jazǵan aqyn Aıbatyr Seıtaq.
Sonymen qatar Farıza aqynnyń óleńderi oqylady.
Aıta keteıik, aqyn, memleket jáne qoǵam qaıratkeri Farıza Ońǵarsynova 1939 jyly 25 jeltoqsanda qazirgi Atyraý oblysynyń Novobogat aýdanyndaǵy Manash aýylynda dúnıege kelgen. 1961 jyly Atyraý memlekettik pedagogıka ınstıtýtyn bitirip, eńbek jolyn aýyldyq mektepte muǵalim bolyp bastaǵan. Odan keıin oblystyq, respýblıkalyq gazet-jýrnaldarda qyzmet atqardy. Sonyń ishinde «Qazaqstan pıoneri» (qazirgi «Ulan») gazetiniń jáne «Aq jelken» jýrnalynyń Bas redaktory boldy. Kóptegen jyr jınaqtarynyń avtory. QR Parlamenti Májilisiniń birneshe shaqyrylymyna depýtat bolyp saılanǵan. Ana men balalar quqyǵyn qorǵaýǵa qatysty zań jobalarynyń bastamashysy boldy. «Qurmet belgisi», «Parasat» ordenderiniń ıegeri, QR Memlekettik syılyǵynyń laýreaty.
2014 jyly F.Ońǵarsynova 75 jasqa qaraǵan shaǵynda dúnıeden ozdy.
