EXPO murasy: Almatyda birqatar ekologııalyq jobalar jasalady

ALMATY. QazAqparat- Almatyda qorshaǵan ortaǵa ekologııalyq júktemeni  azaıtý úshin birqatar jobalar júzege asady. Bul týraly qala ákimdigi baspasóz qyzmeti málim etti, dep habarlaıdy QazAqparat tilshisi.

Almaty ákimi Baýyrjan Baıbek qoqys suryptaıtyn jańa keshenniń, gazben júretin avtobýstar úshin salynyp jatqan kommýnaldy parktiń jáne elektravtobýstardyń sońǵy túrin shyǵaratyn zaýyt qurylystarynyń jumysyn tekserdi.

«Megapolıs basshysy EXPO-2017 murasy aıasynda júrgizilip jatqan jobalar men «Almatyny damytýdyń 50 jobalary - draıverleri» qalalyq bastamasynyń zamanaýı ári mańyzdy ekenin atap ótti. Óıtkeni olar sońǵy ınnovatsııalyq tehnologııalardy tartyp qana qoımaı, jańa jumys oryndaryn quratyp, sonymen qatar qalanyń qorshaǵan ortasyna túsetin ekologııalyq aýyrtpalyqty azaıtady»,- delingen habarlamada.

«FalconEuroBus» Qazaqstan men Germanııanyń birikken kompanııasy avtoparktiń jáne elektravtobýstardyń jańa túrin shyǵaratyn zaýyt salyp jatyr. Qazirgi kezde jalpy alańy 7 myń sharshy metr bolatyn kólikti jınaý jáne boıaý tsehynyń, jabyq turaq pen qoıma bólmeleriniń qurylystary aıaqtalyp qaldy. Alǵashqy kezde óndiristen qala úlesine 20% tıse, keıin onyń mólsheri artady. Jobadaǵy jeke ınvestıtsııa kólemi 15 mlrd teńgeni quraıdy.

 

Sondaı-aq, qala ákimi jyldyq qýaty 550 myń tonna turmystyq qatty qaldyqtardy óńdeıtin jańa keshen qurylysymen tanysty. Búginde qoqys suryptaıtyn keshenniń shatyry jabylýda. Oǵan ornatylǵan ıtalııalyq jabdyqtar jaqyn arada iske qosylyp, jóndeý jumystary da aıaqtalady.

Ákimdik baspasóz qyzmetiniń málimdeýinshe, joba júzege asqanda turmystyq qatty qaldyqtar suryptalyp, tasymaldanady. Jumystyń barlyǵy keshendi basqarý júıesi arqyly atqarylady, al polıgonǵa kómýge qaýiptiligi tómen jáne tez ydyraıtyn  bıozattar jiberiledi, keıin olardy da óńdeý qolǵa alynady. Qurylys obektisi jeke ınvestıtsııa esebinen salynýda.

Gazben jumys isteıtin 200 jolaýshy avtobýsyna qyzmet kórsetetin jańa kommýnaldy avtobýs parkiniń qurylysy kestege saı júrýde. Negizgi nysan men janarmaı quıý stansasynyń metallkonstýrktsııalaryn montajdaý jumystary aıaqtaldy. Qoıma men kólik jýatyn oryndardyń irgetasy quıyldy. Endigi kezekte «Green Bus Company» gazben júretin jyljymaly quramdy alý máselelerin talqylaýda.