EXPO-2017 aýmaǵynda jańa nysandar ashylady

ASTANA. QazAqparat - EKSPO-2017 kórmesine oraı salynǵan nysandar el ekonomıkasynyń qajettiligine ábden daǵdylanǵan. Bul týraly habarlaǵan «Vremıa» gazetiniń jazýynsha, «Astana-EKSPO-2017» kompanııasynyń menedjmenti kórmeden keıingi keshendi taǵy bir ret jańartylǵan kúıinde kórsetti.

Qazirgi tańda EKSPO kesheninde Memleket basshysynyń bastamasymen júzege asyrylǵan 4 iri joba damyp jatyr.

Onyń biri, AHQO Eýrazııalyq keńistiktegi qarjy qyzmetterin usynatyn ilgerli ortalyqqa, sondaı-aq Qazaqstan, Eýropa men Azııa naryqtaryn biriktiretin qarjy habyna aınalyp keledi. Jaqynda AHQO ǵımaratynda tanymal álemdik kompanııalardyń ataýlary jazylady. 14 qarashada Prezıdent Nursultan Nazarbaev «Nur Álem» Sferasynda qarjy ortalyǵynyń bırjasy Astana International Exchange-de alǵashqy saýda-sattyqqa bastama bergen bolatyn.

Astana EKSPO-2017 ınfraqurylymynyń resýrsy bul jobalarmen toqtamaıdy. Jaqynda kórme aýmaǵynda jalpy aýmaǵy 35 myń sharshy metrdi alatyn halyqaralyq sapa standartyndaǵy EXPO Business Centre ashylady.
  

Sonymen qatar, 2019 jyly EKSPO aýmaǵynda iri halyqaralyq jáne ulttyq kórmelerdi, kongrestik sharalar men basqa da mańyzdy sharalardy uıymdastyrýǵa bolatyn Qazaqstandaǵy eń iri kórme ortalyqtarynyń biri ashylady. Ortalyq kópfýnktsıonaldy bıznes-arenaǵa aınalady degen jospar bar. Ortalyqtyń jalpy aýmaǵy - 20 myń sharshy metr, bunyń ishinde jan-jaqty pavılondar men zaldar bar.
 

EKSPO aýmaǵyndaǵy Kongress-ortalyq ta tıimdi jumys istep tur.

Aıta keteıik, EKSPO-2017 kórmesiniń ashylý jáne jabylý saltanaty dál osy Kongress-ortalyqta ótken bolatyn. Kongress-ortalyqtaǵy jyljymaly zaldarǵa 4500 adam syıady, zaldar kez kelgen dızaınerlik ıdeıalardyń oryndalýyna yńǵaıly.

Al, «Nur Álem» Sferasy - kórme kesheniniń ortalyq nysany ǵana emes, EKSPO-nyń basty maqtanyshy. Bul - álemde balamasy joq dıametri 80 metrlik shar ispetti biregeı nysan. Segiz qabattan turatyn nysan Qazaqstan men álemniń túpkir-túpkirinen kelip jatqan qonaqtardy áli tańǵaldyryp tur.