Exit poll: Leıborıster jeńiske jetti
LONDON. KAZINFORM — Ulybrıtanııada ótken Jalpy saılaýda Leıborıster jeńiske jetti. Ulttyq telearnalar ótkizgen ekzıt poll nátıjeleri osylaı deıdi. Eger boljamdar rastalsa, jańa premer-mınıstr Leıborısterdiń kóshbasshysy Kır Starmer bolady, dep habarlaıdy Kazinform tilshisi.
Ekzıt poll nátıjelerine sáıkes negizgi qarsylasynan 170 daýys artyǵymen jınaǵan Leıborıster saıası dodada jeńis tuǵyrynan kórinýi ábden múmkin. Demek partııa kóshbasshysy Kır Starmer premer-mınıstr bolyp, jańa úkimet jasaqtaıdy.
Buǵan deıin oppozıtsııada bolǵan saıası uıymnyń 410 depýtaty Qaýymdar palatasynyń tórinde otyrady. Al el basqarǵan konservatorlardyń sany 131 depýtatqa deıin qysqaryp, olar oppozıtsııaǵa ketedi Bul ekinshi dúnıejúzilik soǵys aıaqtalǵannan bergi Torıler úshin eń tómengi kórsetkish. Ekzıt poldy BBC, ITV jáne Sky telearnalary ótkizdi.
«BıgBen tili túngi 10-dy kórsetip, ekzıt-polldyń nátıjesin jarııalaıtyn ýaqyt keldi. Aldyn ala jasalǵan boljamdarǵa sáıkes ser Kır Starmer leıborısterdi bılik basyna qaıta ákelip otyr», dedi tikeleı efırdi júrgizgen BBC telearnasynyń jýrnalısi Lora Kýenssberg.
Al úshinshi orynda lıberal-demokrattar. Olardyń 61 depýtaty parlamentke múshe bolmaq. Saılaý boıynsha sarapshy Djon Kertıs pen statıstıka toby Anglııa, Shotlandııa jáne Ýelstegi 130-ǵa jýyq saılaý ýchaskelesinde saýalnama júrgizgen. Ekzıt poll Soltústik Irlandııany qamtymaıdy. Biraq onyń nátıjeleri kóbine rastalady.
«14 jyl bılikte otyryp, eldiń toz-tozyn shyǵarǵan Torılerdiń jeńilgenine qýanyshtymyn. Leıborısterdiń kóp oryn ıelengenine qýanyshtymyz», dedi London turǵyndarynyń biri.
«Burynǵy bılik partııasy túk bitirmedi, tek eldi tonaýmen boldy. Biz jumystaryn durys oryndap, elge qamqorlyq jasaıtyn basshynyńkelgenin qaladyq», dedi taǵy bir qala turǵyny.
Eger ekzıt poll boljamdary rastalsa, 2019 jylǵy Jalpy saılaýda nashar nátıje kórsetken Leıborıster partııasy úshin búgingi jeńis óte jaqsy jańalyq bolmaq. Búgin saılaýshylardyń daýystary túgel eseptelip, resmı málimetter jarııa etiledi.
