EUÝ-da qoǵamdyq sanany jańǵyrtý baǵdarlamasyna arnalǵan kórme ótti
Aıta keteıik, kórme Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń úshinshi otyrysy qarsańynda uıymdastyryldy.
Taratylǵan málimetterge qaraǵanda, «Rýhanı jańǵyrý» baǵdarlamasyn basqarý jónindegi keńse (Jobalyq keńse) óz jumysyn bastaǵaly beri mınıstrlikter men ákimdikter usynǵan 1170 jobany pysyqtady, búginde olar júzege asyryla bastaldy.
Jalpy alǵanda, qazaq tilin latyn álipbıine kóshirý jobasy boıynsha tıisti jumys toby jyl sońyna deıin jańa álipbıdiń nusqasyn qaraýǵa usynatyn bolady. Sarapshylar «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda gýmanıtarlyq pánder boıynsha 17 oqýlyqtyń tizimin jasady. Kórme barysynda osy joba boıynsha jumys tobynyń músheleri iriktelgen kitaptardy kópshilik nazaryna usyndy. Atap aıtqanda, búginde baǵdarlamanyń aıasynda qurylǵan Ulttyq aýdarma bıýrosy oqýlyqtardy aýdarýǵa kiristi.
Sonymen qatar, «Qazaqstandaǵy 100 jańa esim» jobasyna 1500 ótinim kelip tústi, olardan ári qaraı ashyq daýys berýge usynylatyn aralyq pýldar túziletin bolady
Munymen qosa, «Jahandaǵy zamanaýı qazaqstandyq mádenıet» jobasy boıynsha úzdik týyndylardyń tizimi jasaldy. Oǵan ádebıet salasyndaǵy 216, «teatr, kıno jáne horeografııa» janryndaǵy 48, beıneleý óneri boıynsha 182 jáne mýzyka salasyndaǵy 200-den astam shyǵarma engizildi. Týyndylardy aldyn-ala irikteý qoǵamdyq talqylaýdy eskere otyryp jasalady. Odan keıin tizim onyń irikteý talaptaryna sáıkestigin saraptaý úshin saraptamalyq toptarǵa usynylady.
Shara barysynda elimizdegi kıeli jerlerge arnalǵan kitaptar men Qazaqstan aýmaǵyndaǵy mańyzdy tarıhı nysandardyń maketteri qoıyldy. Qazirgi kezde Qazaqstannyń kıeli jerleriniń geografııasy» jobasy boıynsha respýblıkalyq deńgeıdegi - 100 jáne óńirlik deńgeıdegi 500 kıeli nysan iriktelip alyndy.
Kórmeni uıymdastyrýshylar «Týǵan jer» jobasy aıasynda aýqymdy derekterdi usyndy. «Rýhanı jańǵyrý» ıdeıasyn alǵa jyljytý maqsatynda patrıottyqqa tárbıeleıtin materıaldar tanystyryldy. Bular negizinen ólketanýdyń jańa oqýlyǵy úshin jınaqtalǵan daıyn materıaldar.
Belgili bolǵandaı, elimizdiń ár óńiri úshin 16 oqýlyq basyp shyǵarylmaq. Osy oraıda 2018-2019 oqý jylynda mektep oqýshylary mindetti túrde óńirlik komponentke sáıkes jıyrma saǵat ólketanýdy oqıdy dep kútilýde.
Esterińizge sala keteıik, Ulttyq komıssııa Qazaqstan Respýblıkasy Prezıdentiniń Jarlyǵymen qoǵamdyq sanany jańǵyrtý baǵdarlamasyn júzege asyrý, eldiń ári qaraı da dáıekti túrde mádenı-gýmanıtarlyq damýyn qamtamasyz etý maqsatynda qurylǵan bolatyn. Komıssııa quramynda tanymal qoǵam qaıratkerleri, ǵalymdar, jazýshylar, jýrnalıster, Parlament depýtattary, Prezıdent Ákimshiliginiń ókilderi, Úkimet músheleri, óńirler men Astana, Almaty qalalarynyń ákimderi, Qazaqstan halqy Assambleıasynyń músheleri jáne saıası partııalardyń ókilderi bar.
