Eýroparlament Ýrsýla fon der Lıaıenge senimsizdik votýmyn qabyldamady

ASTANA. KAZINFORM – Strasbýrg qalasynda Eýropalyq Parlamenttiń kóshpeli otyrysy bolyp, Eýropalyq komıssııanyń prezıdenti Ýrsýla fon der Lıaıenge senimsizdik bildirý boıynsha daýys berý ótti, dep habarlaıdy Kazinform agenttiginiń menshikti tilshisi.

Jıynnyń bastamashysy rýmynııalyq eýrodepýtat George Pıpera boldy. Ol COVID-19 pandemııasy kezinde vaktsınalardy satyp alý jaǵdaıyna baılanysty Eýrokomıssııany otstavkaǵa jiberýge shaqyratyn usynys daıyndady.

Jaǵdaı «Pfaızergeıt» dep ataldy. Bul – Eýropalyq komıssııanyń «Pfizer»kompanııasy shyǵarǵan COVID -19 vaktsınalaryn satyp alýyna baılanysty janjal. 2021 jyldyń sáýirinde Ý.Lıaıen EO-da Pfizer vaktsınasynyń 1,8 mıllıard dozasyna deıin jetkizý týraly kelisim «Pfizer» bas dırektory Albert Býrlamen SMS jáne qońyraýlar arqyly kelisilgenin habarlady.

Jýrnalıster, sonyń ishinde The New York Times gazeti bul habarlamalardy suraǵan kezde, Eýrokomıssııa «mundaı qujattar joq» nemese «olar joıyldy» dep, berýden bas tartty.

Qazir Eýroparlamenttiń ásire ońshyl ókili G.Pıpera Eýrokomıssııany vaktsına boıynsha kelissózderde ashyqtyq joq dep synap jatyr. Ol senimsizdik votýmyn bastaýǵa qol jetkizdi.

Beısenbi kúni daýys berýge 720 depýtattyń 553-i qatysty. 360 Eýroparlament depýtaty senimsizdik votýmyna qarsy bolsa, 175-i Eýropalyq komıssııany taratýdy qoldap, 18-i qalys qaldy. Ý.Lıaıendi ornynan alý úshin 360 daýys qajet bolǵan. Osylaısha, Eýrokomıssııa tóraǵasy óz mindetin atqara beredi.

Daýys berýden keıin Ý.Lıaıen áleýmettik jelide jazba jarııalady. Ol jahandyq turaqsyzdyq pen boljaýǵa bolmaıtyn kezeńde EO-ǵa kúsh, kózqaras pen qabilet qajet ekenin atap ótti.

– Árqaısysymyz ortaq mindetterimizdi oryndaýymyz kerek. Birge. Syrtqy kúshter bizdi turaqsyzdandyrýǵa, jikke bólýge tyrysqandyqtan, qundylyqtarymyzǵa saı jaýap berý – bizdiń mindetimiz. Raqmet, - dedi Ý.Lıaıen.

Buǵan deıin, 8 sáýirde Eýropalyq komıssııanyń tóraǵasy Ýrsýla fon der Lıaıen bir top ońshyl Eýroparlament depýtaty oǵan senimsizdik votýmyn usynǵannan keıin ózin qorǵady.

Aıta keteıik, sot Eýropalyq komıssııa tóraǵasy Ýrsýla fon der Lıaıendi COVID-19 pandemııasy kezinde Pfizer kompanııasynyń bas dırektorymen vaktsına satyp alýǵa qatysty almasqan hattaryn jarııa etýge mindettedi.

Sársenbi kúni Eýropalyq odaq soty Ý.Lıaıenge qatysty is boıynsha rezonansty sheshim shyǵardy.

Osylaısha, Eýropalyq odaqtyń sot organy Eýrokomıssııa basshysy men Pfizer farmatsevtıkalyq kompanııasynyń bas dırektory Albert Býrla arasyndaǵy hat almasýdy ashý sheshimin joıdy.

Rýmynııalyq depýtat George Pıpera Erokomıssııa prezıdenti Ýrsýla fon der Lıaıenge senimsizdik votýmyn qaraý bastamasyn kóterdi.