Eýroparlament depýtattary Ýrsýla fon der Leıendi alyp tastaı ala ma

ASTANA. KAZINFORM —  Eýropalyq Parlamenttiń Strasbýrgtegi aldaǵy otyrysynda Eýrokomıssııa prezıdenti Ýrsýla fon der Lıaıenge senimsizdik votýmyn jarııalaý boıynsha daýys berý ótedi, dep habarlaıdy Kazinform agenttiginiń menshikti tilshisi. 

Osylaısha, Eýropalyq komıssııanyń prezıdenti Ýrsýla fon der Lıaıen óz ókilettiginiń ekinshi merziminde eleýli syn-qaterge tap boldy.

«Pfizergate» dep atalyp ketken daýǵa baılanysty birqatar radıkaldy ońshyl eýrodepýtattar oǵan senimsizdik votýmyn jarııalaý bastamasyn kóterdi.

Bul másele boıynsha daýys berý 10 shildege belgilengen jáne onyń nátıjesi búkil Eýrokomıssııanyń bolashaǵyna eleýli áser etýi múmkin.

Oqıǵa COVID-19 pandemııasy kezinde Ýrsýla fon der Lıaıen men Pfizer kompanııasynyń bas dırektory Albert Býrla arasyndaǵy kelissózderge qatysty tergeýden bastaldy. Eýropalyq sot Eýrokomıssııa basshysy 35 mıllıard eýro kólemindegi vaktsına satyp alý mámilesine qatysty hat-habardy «zańsyz jasyrǵan» degen qorytyndyǵa keldi. Bul jaıt onyń áreketteriniń ashyq emestigi men ókilettikterin teris paıdalanǵany jóninde aıyptaýlarǵa negiz boldy.

Senimsizdik votýmyn negizinen Brıýsseldegi bıliktiń shekten tys ortalyqtandyrylýyn synǵa alatyn, ońshyl-konservatıvti «Eýropalyq konservatorlar men reformashylar» fraktsııasynyń músheleri bastaǵan. Inıtsıatorlar qatarynda Frantsııadaǵy oppozıtsııalyq «Ulttyq birlestik» partııasy, Italııa premeri Djordjııa Melonıdiń odaqtastary, sondaı-aq Polsha, Germanııa jáne Vengrııanyń ońshyl depýtattary bar. Barlyǵy 74 depýtat qol qoıǵan.

Eýroparlament erejelerine sáıkes, senimsizdik votýmynyń qabyldanýy úshin qatysýshy depýtattardyń úshten ekisi daýys berýi kerek, ári depýtattardyń jalpy sanynyń absolıýtti kópshiligi (ıaǵnı 720 depýtattyń keminde 361-i) bul bastamany qoldaýy tıis.

Saıası kúshter teńgerimin eskere otyryp, sarapshylar Ýrsýla fon der Lıaıenniń qyzmetinen bosatylýy ekitalaı dep esepteıdi. Alaıda bul daýys berý faktisiniń ózi onyń saıası bedeline soqqy bolyp, Eýroparlament ishindegi narazylyqtyń kúsheıip kele jatqanyn ańǵartady.

Osylaısha, Ýrsýla fon der Lıaıenge qarsy senimsizdik votýmy – jaı ǵana saıası shabýyl emes, Eýroodaq ınstıtýttaryna degen senim daǵdarysynyń kórinisi. Kraıne ońshyl kúshterdiń tanymaldyǵy artyp keledi jáne olardyń áreketi qoǵamnyń ashyqtyqty, esep berýdi jáne EO-nyń joǵarǵy deńgeıinde de «kýlýarlyq mámilelerden» bas tartýdy qalaıtynyn kórsetedi.

Aıta keteıik, Ýrsýla fon der Lıaıen 2024 jyldyń shilde aıynda Eýropalyq komıssııa prezıdenti qyzmetine ekinshi merzimge qaıta saılanǵan bolatyn.

Aıta ketelik Eýropa parlamentinde Ýrsýla fon der Lıaıenge senimsizdik votýmy protsedýrasy bastalǵany týraly jazǵan edik.