Eýropalyq parlament delegatsııasy «Nur Álemdi» aralady
Joǵary mártebeli qonaqtarǵa pavılonnyń taqyryptyq ekspozıtsııalaryn, sondaı-aq, el ekonomıkasynyń túrli salalaryn «tsıfrlandyrýyna», jańa tehnologııalar men ınvestıtsııalar tartýǵa jáne jańartylǵan energııa kózderine kóshýge aıtarlyqtaı úles qosýǵa qabiletti EKSPO-2017 nysandaryn kórmeden keıin paıdalaný tujyrymdamasymen tanystyrdy.
Qazirgi tańda kórme aýmaǵynda AHQO, «Astana Hub», Halyqaralyq jasyl tehnologııalar ortalyǵy, IT-ýnıversıteti sııaqty aýqymdy jobalar júzege asyrylýda.
Eýroparlament depýtattaryn kórmege kelýshilermen tikeleı qarym- qatynasta bolatyn ınteraktıvti eksponattar erekshe tańdandyrdy.
«Biz qýanyshtymyz! Meniń oıymsha bul kórmeni barlyq adam kelip óz kózderimen kórýi qajet, sebebi «Nur Álem» pavılony tek ádemiligimen ǵana emes, sonymen qatar aqparattyq tanymdylyǵymen de qyzyqty. Ǵarysh energııasyna arnalǵan qabatty erekshe atap ótkim keledi. Planetarıı maǵan qatty áser etkeni sonshalyqty men sál kidirip, óz áriptesterimnen qalyp ta qoıdym», - dep atap ótti Eýroparlament depýtaty Ioahım Tseller.
Qazir ulttyq kompanııa onyń mazmunyn jańartý boıynsha aýqymdy jumystar júrgizip jatyr, munda ár túrli bilim berý, tanymdyq is-sharalar jáne mektep oqýshylary men stýdentterge arnap «ashyq» sabaqtar ótkiziledi.
«Pavılonnyń ár qabatynda ulttyq rýh baıqalady. Meniń oıymsha bul shet eldikter úshin de, eń kishkentaı kórermender úshin de tanymdylyqqa toly qyzyq. Sebebi, óz ultynyń mádenıeti men dástúrlerin jastaıynan úıretý qajet», - deıdi Ivetta Grıgýle hanym.
Ekskýrsııa sońynda Eýroparlament delegatsııasy ulttyq kompanııanyń EKSPO-2017 Halyqaralyq mamandandyrylǵan kórmesi murasyn tıimdi paıdalaný jáne damytý salasyndaǵy qyzmetin joǵary baǵalady.
