Eýropalyq jetekshiler Irandaǵy oqıǵaǵa ún qatty
ASTANA.KAZINFORM — Irandaǵy jaǵdaı álemdik qaýymdastyqtyń nazaryn aýdardy. Qazirgi ýaqytta Kazinform agenttiginiń Belgııadaǵy tilshisi Eýroodaqqa múshe memleketterdiń resmı reaktsııalaryn baqylap otyr.
Eýropalyq komıssııanyń prezıdenti Ýrsýla fon der Lıaıen jáne Eýropalyq keńestiń tóraǵasy birlesken málimdeme jasady.
EO lıderleri jaǵdaıdyń óte alańdatatyndyǵyn atap ótti. Sonymen qatar, EO-nyń aımaqtaǵy seriktesterimen tyǵyz baılanys qoldaý tapty.
Málimdemede ıadrolyq qaýipsizdikti qamtamasyz etý jáne shıelenisýdi týdyrýy múmkin áreketterdiń aldyn alý óte mańyzdy ekeni aıtyldy.
Eýroodaq Irannyń úkimetine jáne Islam revolıýtsııasy saqshylary korpýsyna qatysty «masshtabty sanktsııalar» engizdi.
— Memleket basshylarynyń tyǵyz yntymaqtastyǵy negizinde EO azamattarynyń qaýipsizdigin qamtamasyz etý úshin qajetti sharalardy qabyldaımyz. Barlyq taraptardy sabyrlyq tanytyp, azamattyq halyqty qorǵaýǵa jáne halyqaralyq quqyqty tolyqtaı saqtaý talaptaryn oryndaýǵa shaqyramyz, — dep atap ótti Ý. Lıaıen men A. Koshta.
Italııanyń Syrtqy ister mınıstri Antonıo Taıanı:
— Men jaǵdaıdy baqylap otyrmyn jáne Tegeran men Tel-Avıvtegi ıtalıandyq elshiliktermen únemi baılanystamyn. Aldyńǵy kezekte bizdiń azamattarymyzdyń qaýipsizdigi mańyzdy. Daǵdarys ortalyǵy Farnezınede jumys isteıdi.
Nıderlandynyń Premer-mınıstri Rob Ietten:
— Nıderlandy jaǵdaıdy muqııat baqylap otyr jáne barlyq taraptardy sabyrlyq tanytyp, odan ári shıelenistiń aldyn alýǵa shaqyrady.
Latvııanyń Syrtqy ister mınıstri Baıba Braze:
— Latvııa Taıaý Shyǵystaǵy jaǵdaıdy baqylap otyr jáne óz elshilikterimen baılanysta. Men Izraıldiń Syrtqy ister mınıstri G. Saarmen telefon arqyly sóılestim. Latvııa barlyq taraptardy sabyrlyq tanytyp, shıelenistiń aldyn alýǵa shaqyrady. Aımaqtaǵy turaqtylyq jahandyq qaýipsizdik úshin mańyzdy bolyp tabylady.
Esterińizge sala keteıik, búgin tańerteń Izraıl Tegeranda «preventıvti soqqy» jasady.
Keıin AQSh Prezıdenti Donald Tramp Iranǵa qarsy aýqymdy áskerı operatsııa bastalǵanyn málimdedi.
Iran soltústik jáne ortalyq Izraılge zymyran atqylady.