Eýropalyq Odaq tasqyn sýdan zardap shekkenderge 200 000 eýro kóleminde gýmanıtarlyq kómek bóldi
BRıÝSSELЬ. KAZINFORM – 117 000-nan astam adam zardap shekken Qazaqstannyń birneshe oblystarynda bolǵan aýqymdy sý tasqynyna baılanysty Eýropalyq Odaq eń kóp zardap shekken otbasylarǵa kómek retinde 200 000 eýro kóleminde gýmanıtarlyq kómek bóldi.
Qazaqstan Respýblıkasynyń Qyzyl Jarty Aı Qoǵamyna qoldaý kórsetý aıasynda EO-tyń bul qarjylandyrýy asa qajetti shuǵyl kómekti, sonyń ishinde matrastar men tósek-oryn jabdyqtary, kóp maqsatty aqshalaı qarajat pen gıgıenalyq materıaldar sııaqty turmystyq zattarmen qamtamasyz etýge baǵyttaldy.
«Aldaǵy úsh aı ishinde kórsetiletin gýmanıtarlyq kómek sý tasqynynan aýyr zardap shekken 5 myń adamǵa tikeleı baǵyttalatyn bolady. Otbasyn ustap otyrǵan áıelderge, múgedek nemese qart adamdary bar otbasylarǵa, úsh baladan kóp balasy bar otbasylarǵa kómek kórsetýge erekshe kóńil bólinetin bolady», - delingen habarlamada.
Qarjylandyrýdy EO Halyqaralyq Qyzyl Krest jáne Qyzyl Jarty Aı Qoǵamdary Federatsııasynyń Tótenshe jaǵdaılarǵa qarsy áreket etý qorynyń jalpy jarnasynan bólgen.
Sáýir aıynyń basynda tolassyz jaýǵan jańbyr men kóktemgi qar sýynan keıin Qazaqstannyń birneshe óńirinde sý tasqyny bolyp, 117 myńnan astam adam úılerin tastap ketýge májbúr boldy. Sý tasqynynyń sharyqtaý shegi Aqmola, Aqtóbe jáne Qaraǵandy oblystarynda ótip úlgerse, Shyǵys Qazaqstan oblysynda bir aptadan keıin sharyqtaý shegine jetedi dep kútilip otyr. Aldaǵy ýaqytta Batys Qazaqstan oblysynda sý tasqynynyń ekinshi tolqyny bolýy múmkin. Sý tasqyny saldarynan 5700-den astam mal qyrylyp, qazir 60 myń bas basqa jerge qonystandyryldy. Bılik ókilderi sý tasqynynan zardap shekken aýdandardan adamdardy evakýatsııalady, al Ulttyq Qyzyl Krest/Qyzyl Jarty Aı Qoǵamy gıgıenalyq quraldardy, matrastar men tósek-oryndardy taratyp, sý arqyly beriletin aýrýlar týraly densaýlyqqa qatysty negizgi aqparat bere bastady. Qyzyl Jarty Aı qoǵamy qonys aýdarǵan adamdardy qorǵaý qajettilikterin de baǵalap otyr.
Anyqtamalyq aqparat
Eýropalyq Odaq jáne oǵan múshe memleketter gýmanıtarlyq kómektiń dúnıejúzindegi iri donory bolyp tabylady. Bul búkil álemdegi kómekke muqtaj adamdarǵa kórsetilgen eýropalyq nıettestiktiń kórinisi. Kómek adamdardyń ómirin saqtap qalýǵa, adamdardyń qaıǵy-qasiretiniń aldyn alý men ony jeńildetýge, sondaı-aq tabıǵı apattar men tehnogendik daǵdarystarǵa ushyraǵan halyqtyń derbestigi men abyroıyn qorǵaýǵa baǵyttalǵan.
Gýmanıtarlyq kómek jáne azamattyq qorǵaý departamentiniń jumysy aıasynda Eýropalyq Odaq jyl saıyn qaqtyǵystar men tabıǵı apattardyń mıllıonnan astam qurbandaryna kómektesedi. Shtab-páteri Brıýssel qalasynda ornalasqan, álem boıynsha ókildikteri bar Eýropalyq Odaq eń osal toptarǵa gýmanıtarlyq qajettilikter negizinde kómek kórsetip keledi.
Eýropalyq Odaq tabıǵı apat jaǵdaıynda Tótenshe jaǵdaılarǵa qarsy áreket etý qoryna (DREF) qoldaý kórsetý úshin Qyzyl Krest jáne Qyzyl Jarty Aı Halyqaralyq Qoǵamdar Federatsııasymen (IFRC) 8 mıllıon eýro kóleminde gýmanıtarlyq jarna boıynsha kelisimge qol qoıdy. DREF qarajaty negizinen «usaq aýqymdy» apattarǵa bólinedi, ıaǵnı resmı halyqaralyq úndeýdi talap etpeıtin jaǵdaılarda qoldanylady.
Tótenshe jaǵdaılarǵa qarsy áreket etý qory 1985 jyly quryldy jáne donorlyq jarnalar arqasynda qyzmet isteıdi. Ulttyq Qyzyl Krest nemese Qyzyl Jarty Aı qoǵamy apatqa qarsy áreket etý úshin shuǵyl qarjylyq qoldaýdy qajet etetin kezde, ol DREF Qorynan qarajat suraı alady. Kishigirim tabıǵı apattar jaǵdaıynda IFRC Qordan granttar bóledi, olardy donorlar ári qaraı tolyqtyra alady. IFRC men ECHO arasyndaǵy jarna týraly kelisim sońǵysyna jalpy somasy 10 mıllıon eýroǵa deıingi kelisilgen operatsııalar úshin (onyń gýmanıtarlyq mandatyna sáıkes keletin) DREF Qoryn toltyrýǵa múmkindik beredi.
