Eýropada qoǵamdyq oryndarda shylym shegýge shekteý engiziledi

ASTANA. KAZINFORM – Birqatar eýropalyq qalanyń mýnıtsıpaldy bıligi jańa shekteýler engiziletinin jarııalady, dep habarlaıdy AZERTADJ.

2027 jyldyń 1 qańtarynan bastap dámhana, bar men meıramhanalardyń ashyq terrasalarynda shylym shegýge jáne elektrondy temeki qoldanýǵa tolyq tyıym salynady.

Bul shekteý keıbir mekemelerde, áýejaılarda, sıgar klýbtarynda áli jumys istep turǵan arnaıy shylym shegý bólmelerine de taralady. Tyıym barlyq túrdegi temeki ónimderine, elektrondy temekilerge, veıpterge jáne qorqorlarǵa qoldanylady.

Jańa erejelerdiń kúshine ený kúni seısenbi kúni tańerteń jarııalandy. Bul shara Eýropalyq komıssııanyń usynymdary negizinde ázirlengen bastamalar toptamasyna engizildi. Qoǵamdyq tamaqtaný oryndaryna ózgeristerge daıyndalý úshin shamamen bir jarym jyl ýaqyt beriledi.

2027 jyldyń qańtarynan bastap temeki tartýǵa meıramhana, bar jáne dámhanalardyń mańynda 10 metr qashyqtyqta da tyıym salynady. Tyıym kúshine engennen keıin klıentterge kúlsalǵysh usynýdy jalǵastyrǵan ıelerine jaza qoldanylady. Sondaı-aq, erejeni buzǵan kelýshiler de jaýapkershilikke tartylady.

Sonymen qatar, qujatta jergilikti bılik organdary jappaı is-sharalar — festıvalder, jármeńkeler men bazarlar kezinde shylym shegýdi shekteýdiń qosymsha sharalaryn ázirleýi tıis ekendigi kózdelgen.

Restoratorlar qaýymdastyǵy jańa shekteýlerdiń bankrottyqtyń kezekti tolqynyn týdyrýy múmkin ekenin aıtyp otyr. Olardyń pikirinshe, tyıym shylymqorlar sanyn azaıtpaıdy, tek olardy kóshege yǵystyrady. Bul turǵyndarǵa qolaısyzdyq týǵyzyp, mekeme qyzmetkerleri úshin baqylaýdy qıyndatady.

Alǵashynda Eýropalyq komıssııa bul tyıymdy 2026 jyly engizýdi usynǵan, alaıda salaǵa daıyndyqqa kóbirek ýaqyt berý úshin merzim keıinge shegerildi.

Aıta ketelik Ispanııada jasóspirimderge temeki shegýge tyıym salynyp, ata-analarǵa aıyppul engiziledi.