Eýropada eń joǵary jalaqy qaı elderde
ASTANA. KAZINFORM — Eýroodaqta áleýmettik aýdarymdar qyzmetker jalaqysynyń úshten birine deıin jetýi múmkin, dep habarlaıdy Euronews.
Eger siz Lıýksembýrgte jumys isteseńiz, jolyńyz bolǵany – bul elde Eýropa boıynsha ortasha saǵattyq taza jalaqy eń joǵary deńgeıde. Osy aptada jarııalanǵan Eýrostattyń jańa derekterine sáıkes, qurlyqtyń qaq ortasynda ornalasqan bul Uly gertsogtikte ortasha taza jalaqy saǵatyna 49,7 eýro.
Ekinshi orynda – Islandııa (47,0 eýro), odan keıin Norvegııa (45,8 eýro) jáne Danııa (44,7 eýro).
Kesteniń tómengi jaǵynda Latvııa (12,9 eýro), Rýmynııa (12,9 eýro) jáne eń tómen kórsetkishke ıe Bolgarııa (10,5 eýro) ornalasqan.
Qaı elderde taza jalaqy jyldam ósip keledi?
2021–2025 jyldar aralyǵynda Bolgarııada taza jalaqynyń eń joǵary ósimi tirkeldi – 69,4%.
Polsha da joǵary nátıje kórsetti: osy kezeńde salyqtan keıingi jalaqy 66%-ǵa ósti, odan keıin 61,3% ósimmen Rýmynııa keledi.
Horvatııa, Lıtva jáne Vengrııada da taza jalaqy orta eseppen 50%-dan astamǵa artqan.
Al Norvegııada (5,5%), Shvetsııada (6,1%) jáne Italııada (10,6%) jalaqy ósimi eń baıaý bolǵan.
Germanııa, Frantsııa jáne Ispanııada da jalaqy ósimi EO boıynsha ortasha 20% kórsetkishten tómen boldy.
Qaı elderde salyq júktemesi joǵary?
EO-da orta jáne shaǵyn bıznesti ashý men júrgizý jumys berýshiler úshin qymbatqa túsýi múmkin.
Keminde 10 qyzmetkeri bar kásiporyndarda bir qyzmetkerdiń eńbegi shamamen saǵatyna 35 eýro turady. Eýroaımaqta bul kórsetkish 38 eýroǵa deıin jetedi.
Bul somanyń shamamen tórtten biri jalaqydan tys shyǵyndarǵa, ıaǵnı áleýmettik jarnalarǵa tıesili. Alaıda elder arasynda aıyrmashylyq úlken.
Eýrostat málimetinshe, jalaqydan tys eń joǵary shyǵyn Frantsııada (32%), Shvetsııada (32%) jáne Slovakııada (29%) tirkelgen. Al Rýmynııa, Lıtva jáne Maltada bul kórsetkish is júzinde nólge teń.
Ispanııa men Italııada eńbekke salynatyn salyq EO ortasha deńgeıinen joǵary, al taza jalaqy kerisinshe tómen.
Qaı elderde jumys kúshiniń jalpy quny eń joǵary?
Jumys berýshiler eń kóp tóleıtin el – Lıýksembýrg. Munda jalaqy men áleýmettik aýdarymdardy qosa eseptegende, bir saǵattyq eńbek quny shamamen 57 eýro. Bul EO-daǵy eń joǵary kórsetkish.
Bul Danııadan shamamen 5 eýroǵa, al úshinshi orynda turǵan Nıderlandtan shamamen 10 eýroǵa joǵary.
Al reıtıngtiń tómengi bóliginde aıyrmashylyq aıqyn baıqalady. Bolgarııada jumys kúshiniń quny nebári 12 eýro bolsa, Vengrııada 15 eýrodan sál ǵana asady.
Eýrostat dereginshe, 2024 jylmen salystyrǵanda 2025 jyly EO boıynsha jumys kúshiniń saǵattyq quny 4,1%-ǵa, al eýroaımaqta 3,8%-ǵa ósti.
Jalpy eńbek shyǵyndary azaıǵan jalǵyz el – Malta (-0,5%). Al eń joǵary ósim Bolgarııada (+13,1%), Horvatııada (+11,6%) jáne Slovenııada (+9,3%) tirkeldi.
Aıta ketelik Grekııada eń tómengi jalaqy 920 eýroǵa deıin ósetini týraly jazǵan edik.