Eýropa teńizderinde medýzalar sany artyp jatyr

ASTANA. QazAqparat – Shotlandııa jaǵalaýynda medýzalar sany aıtarlyqtaı artqan. Ǵalymdar abaı bolýǵa jáne úı janýarlaryn kózden tasa qylmaýǵa shaqyryp jatyr, dep habarlaıdy QazAqparat Euronews-ke silteme jasap.

Teńizdi qorǵaý qoǵamy (MSC) elde keıingi birneshe jylda Eýropada jıi kezdesetin osy tirshilik ıesiniń sany rekordty deńgeıge jetkenin habarlady.

Medýzalardyń kóptigi týraly Shotlandııa taýly aımaqtarynyń turǵyndary, Syrtqy Gebrıd araldary jáne Aırshır turǵyndary habarlaǵan. Alaıda, Shotlandııa boıynsha MSC mamany Ketrın Gemmelldyń atap ótýinshe, kórsetkish boıynsha rekordty jyl bolatyny nemese bolmaıtyny týraly aıtý áli erte.

MSC 20 jyl boıy medýzalardyń esebin júrgizip keledi jáne jergilikti turǵyndardy uıymnyń veb-saıtynda tabylǵan tirshilik ıeleri týraly habarlaýǵa shaqyrady.

Medýzalar muhıt temperatýrasynyń ózgerýiniń kórsetkishi bolyp sanalady, sondyqtan ǵalymdar olardyń áreketin baqylaıdy.

Shotlandııa jaǵalaýynda medýzanyń ártúrli túrleri, sonyń ishinde qulaqty medýza jáne túkti tsıaneıa tabyldy. Bulardyń barlyǵy shaǵýy múmkin, sondyqtan olar jaǵalaýda óli jatsa da, olarǵa qol tıgizýge bolmaıdy.

Medýzalar adamdar úshin asa qaýipti bolmasa da, úı janýarlary úshin qaýipti. Sondyqtan saıahatshylarǵa ıtterdi serýendetý kezinde abaı bolý usynylady.

Medýzanyń shabýylynan tek Shotlandııa ǵana zardap shegip jatqan joq. Tek osy aptada Jerorta teńizinde jer betindegi eń jyly temperatýra - 28,7°C boldy. Óıtkeni medýzalar jyly, ottegi joq sýlarda ózderin jaqsy sezinedi.

Bıyl myńdaǵan medýza Malta men Gotso jaǵalaýyna shyǵyp qaldy, sonyń saldarynan jergilikti turǵyndar men týrıster kóptegen tanymal aılaqtarda shomyla almaı qaldy.