Eýropa keıingi 33 jyldaǵy eń uzaq úzdiksiz ınflıatsııaǵa tap boldy

ASTANA. QazAqparat – Aqpanda Eýropa bırjalaryndaǵy gaz baǵasy keıingi jarty jyldaǵy eń tómen deńgeıge tústi. Ony qystyń boljanǵandaı asa sýyq bolmaǵanymen baılanystyryp otyr. Degenmen onyń áseri tutynýshylarǵa jaqyn arada jete qoımaýy múmkin. Ásirese bul jaǵdaı azyq-túlik ónimderine qatty áser etip jatyr: Eýropa dúkenderindegi baǵa áli de ósýde, dep habarlaıdy QazAqparat Euronews agenttigine silteme jasap.

«Biz energotasymaldaýshylar men azyq-túlik baǵasy týraly aıtqanda «keshigý» áseri bolatynyn eskerýimiz qajet. Salystyrmaly túrde qazir energııa baǵasynyń tómen bolýy azyq-túlik ónimderi óndirisi baǵasynyń da arzandaýyna ákelýi kerek, sonda biz aıyrmashylyqty kóre alamyz. Al qazirgi sýpermarketterdegi baǵalar jarty jyl burynǵy energııanyń baǵasyna saı bolyp tur. Sol sebepti eger energotasymaldaýshylar baǵasy turaqtansa, azyq-túlik ónimderi shamamen alty aıdan keıin arzandaıdy», - deıdi TELF AG sarapshysy Rık de Olıveıra.

Vengrııada azyq-túlik 50 %-ǵa qymbattady, Lıtva men Slovakııada úshten bir ese kóterildi. Bıyl baǵanyń ósimi toqtasa da satyp alý qabiletiniń tómendeýi uzaqmerzimdi máselege alyp keledi.

«Tutynýshylardyń senimi jyl sońyna qaraı artady dep boljaı alamyz, biraq ómir quny daǵdarysymen kúresý úshin odan da uzaq ýaqyt kerek», - dep pikir bildirdi TELF AG sarapshysy Rık de Olıveıra.

Saıasatkerler ómir quny daǵdarysy týraly aıtyp jatyr. Azyq-túlik baǵasy 10 aıdan beri kóterilýde. Dúnıejúzilik ekonomıkalyq forým deregi boıynsha, bul keıingi 33 jyldaǵy úzilissiz ınflıatsııanyń eń uzaq merzimi.