Eýropa Keńesi Taıaý Shyǵystaǵy daǵdarysty shuǵyl talqylamaq
ASTANA. KAZINFORM — Eýropa Keńesi Taıaý Shyǵystaǵy jaǵdaıdy Eýropa keńesiniń mınıstrler komıteti otyrysynyń kún tártibine engizedi. Bul týraly Eýropa keńesiniń bas hatshysy Alen Berse málimdedi, dep habarlaıdy Kazinform agenttiginiń Brıýsseldegi tilshisi.
Onyń aıtýynsha, Taıaý Shyǵys Eýropa keńesiniń shyǵys shekaralaryna taıaý aýmaqta aýqymdy qaqtyǵysqa qaraı oıysyp barady. Zymyran soqqylary halyqaralyq quqyqty «qarýǵa» aınaldyryp otyr, al Iran men búkil óńirdiń beıbit halqy negizgi soqqyny qabyldap jatyr.
— Bul eskalatsııa sońǵy daǵdarys tizbegimen qatar Eýropa keńesine múshe 46 memleket deńgeıinde quqyq buzýdy, kúsh qoldaný men sanktsııalardy baǵalaı alatyn, sheshimderdi toqyraýsyz ári úılesimdi qabyldaýdy qamtamasyz etetin ortaq eýropalyq quqyqtyq tetik qurý qajettigin aıqyn kórsetedi. Buryn talqylanǵan másele endi strategııalyq qajettilikke aınaldy, — delingen Alen Berseniń málimdemesinde.
Onyń sózinshe, Eýropa Parsy shyǵanaǵyndaǵy shıelenisti báseńdetý úshin naqty sheshim qabyldap, óńirdegi óz azamattarynyń qaýipsizdigin qamtamasyz etýi tıis. Sonymen qatar halyqaralyq quqyqty, sonyń ishinde BUU jarǵysyn qurmetteýdi talap etýi qajet.
Bas hatshy barlyq tarapty dereý atysty toqtatýǵa shaqyrdy jáne Taıaý Shyǵystaǵy qaqtyǵystyń ýshyǵýyn Eýropa keńesi mınıstrler komıtetiniń kelesi otyrysynyń kún tártibine engizetinin aıtty. Bul Eýropanyń birtutas quqyqtyq baza aıasynda úılesimdi áreket etý qabiletin ujymdyq túrde talqylaýǵa múmkindik beredi.
Alen Berseniń pikirinshe, ýaqyt sheshýshi ról atqarady. Eger turaqty ári mindetti quqyqtyq qurylym sheńberinde ujymdyq eýropalyq qaýipsizdik júıesi qalyptastyrylmasa, Eýropa ózge taraptar týyndatqan daǵdarystarǵa tek reaktıvti túrde jaýap berýmen shekteledi. Onyń oıynsha, jalǵyz balama qaýipsizdik pen bedeldi zań aıasynda qalpyna keltirý.
Aıta keteıik, Eýropa keńesiniń mınıstrler komıteti — uıymǵa múshe 46 eldiń syrtqy ister mınıstrlerinen turatyn joǵary dırektıvalyq jáne atqarýshy organ. Parlamenttik assambleıadan aıyrmashylyǵy, mınıstrler komıteti zańdy kúshi bar sheshimder qabyldaı alady.
Buǵan deıin Eýroodaq elderiniń syrtqy ister mınıstrleri shuǵyl konferentsııa ótkizetini habarlanǵan edi.