Eýroodaq ókilderi elordada tal ekti

NUR-SULTAN. QazAqparat - Búgin Eýropalyq Odaqtyń klımattyq dıplomatııasy jáne #EU4GreenKZ naýqany aıasynda Eýropalyq Odaqtyń Qazaqstandaǵy Ókildigi osy uıymǵa múshe memleket ókilderimen birlesip, Nur-Sultan qalasy ákimdiginiń qoldaýymen EKSPO aýmaǵynda aǵash otyrǵyzý is-sharasyn uıymdastyrdy, dep habarlaıdy QazAqparat tilshisi.

«Eýroodaq Qazaqstannyń ornyqty damý jolynda jasaǵan batyl qadamdaryn joǵary baǵalaıdy. 2013 jyly Qazaqstan «jasyl ekonomıkaǵa» kóshý boıynsha jospardy iske qosty. Bul – Eýropa men Ortalyq Azııa óńirindegi eń mańyzdy josparlardyń biri. Biz ekijaqty jáne aımaqtyq «jasyl ekonomıka « baǵdarlamalarymyz arqyly Qazaqstannyń bul jetistikterine úles qosqanymyzdy maqtan tutamyz. Qorshaǵan orta men «jasyl ekonomıka « salasyndaǵy yntymaqtastyq – 2020 jyldyń naýryz aıynda kúshine engen Qazaqstan men EO arasyndaǵy Keńeıtilgen áriptestik pen yntymaqtastyq týraly kelisimniń basty baǵyttarynyń biri», - dep atap ótti Qazaqstandaǵy EO elshisi Sven-Olov Karlsson.

27 tal kósheti (15 shyrsha jáne 12 emen aǵashy) – EO-ǵa múshe 27 memlekettiń sımvoly ispettes. Bul aǵashtar Qazaqstan men Eýroodaq arasyndaǵy dostyq pen «jasyl» jáne turaqty bolashaqqa ortaq beıildiliktiń nyshany bolmaq.

«Nur-Sultan aýmaǵyndaǵy «jasyl beldeý» aýmaǵy ulǵaıyp, 2022 jylǵa qaraı 1100 gektarǵa jetedi. Qazirdiń ózinde elorda mańyndaǵy tal sany 137 mıllıonǵa jetti. Taǵy da 50 mıllıonǵa jýyq tal egiledi dep josparlanýda. Elbasy Nursultan Nazarbaev ta, Prezıdent Qasym-Jomart Toqaev ta halyqqa Joldaýlarynda eldiń «jasyl ekonomıkaǵa» kóshýin jáne ekologııalyq ahýaldy jaqsartýǵa qatysty máseleni aıtyp ótedi. Jyl saıyn elimizde qorshaǵan ortany qorǵaý, ekologııalyq jaǵdaıdy jaqsartý baǵytynda ártúrli sharalar uıymdastyrylady. Jýyqta qabyldanatyn jańa ekologııalyq kodeks - solardyń biri», - deıdi QR Ekologııa, geologııa jáne tabıǵı resýrstar mınıstri Maǵzum Myrzaǵalıev.

Atalǵan sharaǵa Qazaqstanda tirkelgen EO-nyń 21 múshe memleketteriniń elshileri men joǵary ókilderi qatysty.

«Elimiz boıynsha 2 mıllırdqa jýyq kóshet otyrǵyzylady. Nur-Sultan QR Tuńǵysh Prezıdenti, Elbasy – Nursultan Nazarbaevtyń bastamasyn alǵash bolyp qoldaǵan qala - «Jasyl beldeý» elordaǵa qalaı áser etkenin kórip otyrmyz, klımat ózgerdi, turǵyndar úshin yńǵaıly bola bastady. Qalanyń damýy úshin ınfraqurylymdy damytý mańyzdy, biraq «Jasyl beldeý» týraly da umytpaýymyz kerek. Búgingi shara qorshaǵan ortany qorǵaýdy umytyp ketpegenimizdiń mysaly» - deıdi elorda ákiminiń orynbasary Malıka Bekturova.

Eýropalyq Odaq ókilderiniń aıtýynsha, uıym klımattyń ózgerýine qarsy kúres boıynsha halyqaralyq is-qımyldardyń aldyńǵy qatarynda jáne seriktes elderdiń klımattyń ózgerýine, qorshaǵan orta men ekojúıelerdi qorǵaýǵa baǵyttalǵan jumysyn qoldaıdy. 2015-2018 jyldar aralyǵynda EO Qazaqstannyń uzaq merzimdi ekologııalyq turaqtylyǵy men ekonomıkalyq damýyn qamtamasyz etýge baǵyttalǵan 7 mıllıon eýrony quraıtyn baǵdarlamasy arqyly Qazaqstannyń «jasyl ekonomıka» modeline kóshýin qoldady. Qazaqstannyń «jasyl ekonomıka» modeline kóshýge degen maqsaty EO-nyń Ortalyq Azııadaǵy ekologııalyq, klımat jáne sý turaqtylyǵyn arttyrý boıynsha kúsh biriktirý aımaqtyq basymdylyǵymen úılesedi.

Búgingi tańda EO-nyń sý, energııa, qorshaǵan orta jáne sý-azyq-túlik-energııa baılanysyn turaqty paıdalanýdy qamtıtyn 15 aımaqtyq baǵdarlamasy bar. Olardyń jalpy somasy shamamen 100 mıllıon eýrony quraıdy, sonyń ishinde flagmandyq qorshaǵan orta men sý resýrstary salasyndaǵy yntymaqtastyq boıynsha WECOOP jáne NEXUS baǵdarlamalary jáne Ortalyq Azııa sý jáne energetıka qaýipsizdigin damytý baǵdarlamasy (CAWEP).

#EU4GreenKZ naýqany sheńberinde Qazaqstandaǵy EO Ókildiginiń áleýmettik jeli paraqshalarynda Ecoselfie foto baıqaýyn, Erazmýs stýdentteriniń qatysýymen «Green Europe Tour» jobasy men onlaın «jasyl» sheberlik synyptary serııasyn uıymdastyrý josparlanǵan.