Eýroodaq Lıvandaǵy jaǵdaıǵa qatysty málimdeme jasady

ASTANA. KAZINFORM — Eýropalyq Syrtqy is-qımyl qyzmeti Lıvanda Izraıldiń shabýylyna qatysty bólek málimdeme jasady, dep habarlaıdy Kazinform agenttiginiń Brıýsseldegi menshikti tilshisi. 

EO Izraıldiń Lıvandaǵy áreketteriniń uzaqqa sozylǵan qaqtyǵys týdyrýy múmkin joıqyn gýmanıtarlyq saldaryn atap ótti.

— Izraıl Lıvandaǵy operatsııalaryn toqtatýy kerek. Lıvandaǵy gýmanıtarlyq jaǵdaı onsyz da aýyr: Lıvan halqynyń shamamen 25%-yn quraıtyn 1 mln-nan astam adam jappaı qonys aýdarýyn jalǵastyryp otyr, — delingen málimdemede.

Eýropalyq Odaq ókilderiniń aıtýynsha, beıbit turǵyndar da qatty zardap shegip otyr: Lıvannyń Densaýlyq saqtaý mınıstrligi málimetinshe, qaza tapqandar sany shamamen 900 adamǵa jetken, onyń ishinde 100-den astamy – balalar.

— Biz «Hezbollanyń» Lıvandy osy soǵysqa tartý sheshimin, ony qarýyn tapsyrýdan bas tartýyn jáne Izraılge qarsy úzdiksiz shabýyldaryn aıyptaımyz, — delingen EO dıplomatııalyq organynyń málimdemesinde.

Budan basqa, Brıýssel beıbit turǵyndar, ınfraqurylym, medıtsınalyq qyzmetkerler jáne densaýlyq saqtaý nysandaryna, sondaı-aq BUU Lıvandaǵy Ýaqytsha kúshterine jasalǵan shabýyldardy negizsiz dep sanaıdy.

— Lıvan men Izraıldiń tikeleı kelissóz bastaýy mańyzdy. Biz barlyq tarapty BUU Qaýipsizdik Keńesi 1701-qararyn tolyq oryndaýǵa jáne Lıvan úkimetiniń «Hezbollany» qarýsyzdandyrý jáne onyń áskerı qyzmetin toqtatý jónindegi kúsh-jigerin qoldaýǵa shaqyramyz, — dep sanaıdy EO.

Osyǵan deıin Frantsııa prezıdenti Makron Iran prezıdenti Pezeshkıandy Taıaý Shyǵys elderine shabýyldy toqtatýǵa shaqyrǵanyn jazdyq.