Eýroodaq bizden jańartylatyn qýat satyp alǵysy keledi
ASTANA. KAZINFORM – Energetıka mınıstri Almasadam Sátqalıev Úkimet otyrysynan keıin ótken brıfıngte Qazaqstan-Ázerbaıjan-Ózbekstan úshtigi qolǵa alǵan energetıkalyq jobanyń keleshegi týraly pikir bildirdi.
«Astana ekonomıkalyq forýmy aıasynda Qazaqstan, Ázerbaıjan, Ózbekstan energetıka mınıstrleri jasyl energetıkany damytý jáne ony keleshegi bar naryqtarǵa tasymaldaý týraly kelisimge qol qoıǵan bolatyn. Eýroodaq tarapynan aldyn ala jumys júrgizildi. Olar taza elektr energııasyn satyp alýǵa qyzyǵýshylyq bildirdi», - dedi Almasadam Sátqalıev.
Sondaı-aq, ol Ázerbaıjan Qara teńiz tabanyna elektr kabelin tartý jobasyn zerttep jatqanyn aıtty.
«Sáıkesinshe úsh memleket Kaspıı tabanyna joǵary kerneýli elektr kabelin tartý týraly kelisimge qol qoıǵan. Bul bizge taza jańartylatyn energııany áleýetti naryqtarǵa jetkizýge múmkindik beredi. Áńgime úlken kólemdegi ınvestıtsııalar týraly bolyp otyr. Biz ol úshin Kaspıı mańyndaǵy óńir men Araldyń áleýetin paıdalanýdy josparlap otyrmyz», - dedi mınıstr.
