Euronews nusqasy boıynsha Vengrııadaǵy jyl sózi - «Qypshaq»

NUR-SULTAN. QazAqparat – Euronews telearnasynyń nusqasy boıynsha «Qypshaq» Vengrııada jyl sózi boldy, dep habarlaıdy QazAqparat tilshisi.

Táýlik boıy habar taratatyn Euronews eýropa telearnasy 2019 jyly Eýropadaǵy eń mańyzdy jáne tanymal sózderge qorytyndy jasady.

Telearna nusqasy boıynsha Vengrııada jyl sózi degen ataýǵa «Qypshaq» sózi laıyq dep tanylypty. Arnanyń aıtýynsha, eldiń premer-mınıstri Vıktor Orban Qazaqstannyń birinshi prezıdenti Nursultan Nazarbaevty qypshaqtardyń dosy dep ataǵanda vengrler qatty tańqalǵan. «Qypshaqtar Vengrııada ómir súredi, vengrlerde qypshaqtyń qany bar», - dep atap ótti Vengrııa premer-mınıstri. Bul oqıǵa Orban Túrkitildes memleketterdiń Yntymaqtastyq keńesine barǵan kezde bolǵan.

Euronews málimeti boıynsha, aǵylshyn tilindegi eń tanymal sóz «fatigue» -sharshaý. Euronews tilshisi bul sóz Brexit jaǵdaıyna baılanysty turaqsyzdyqtan sharshaǵan Ulybrıtanııadaǵy kóńil kúıdi sıpattaıtynyn aıtty.

Euronews Parıj Qudaı-ana soboryndaǵy órtten keıin Frantsııanyń jyl sózi «restauration» - qalpyna kelý, restavratsııa bolady dep sheshken. Budan bólek, tilshi eýropalyq ınstıtýttarǵa el azamattarymen baılanys ornatatyn kez keldi dep esepteıdi.

Sonymen qatar, telearna ıtalıan, grek, ıspan, nemis jáne basqa eýropa tilderindegi eń tanymal sózderdi atady.