Eýrokomıssııa prezıdenti EO-nyń 2 trln eýro kólemindegi strategııalyq bıýdjetin usyndy
ASTANA. KAZINFORM — Eýropalyq komıssııa prezıdenti Ýrsýla fon der Lıaıen 2028-2034 jyldarǵa arnalǵan jalpy quny 2 trıllıon eýrony quraıtyn Eýropalyq odaqtyń jańa bıýdjettik josparyn tanystyrdy. Bul týraly Kazinform tilshisi habarlaıdy.
Usynylǵan qujat 2020 jyly EO basshylary maquldaǵan 1,21 trln eýro kólemindegi aldyńǵy bıýdjetpen salystyrǵanda aıtarlyqtaı ulǵaıǵan.
– Bul – Eýropanyń jańa dáýirine arnalǵan bıýdjet. Ol odaqtyń ambıtsııalaryna sáıkes keledi, qazirgi syn-qaterlerdi sheshedi jáne táýelsizdigimizdi kúsheıtedi, – dedi Eýrokomıssııa basshysy sársenbi kúni ótken tanystyrylymda.
Jańa bıýdjettik qurylym úsh negizgi baǵytqa negizdelgen:
-
865 mlrd eýro – aýyl sharýashylyǵy, balyq sharýashylyǵy, áleýmettik saıasat pen aımaqtyq damýǵa;
-
410 mlrd eýro – básekege qabilettilikke, onyń ishinde ǵylym men ınnovatsııalarǵa;
-
200 mlrd eýro – syrtqy saıasat jáne halyqaralyq is-qımyldarǵa baǵyttalmaq.
Eýrokomıssııa usynǵan jobaǵa sáıkes, bıýdjettiń basym bóligi EO-ǵa múshe elderdiń tikeleı jarnalary esebinen qarjylandyrylady. Sonymen qatar, Brıýsseldiń tabysyn arttyrý úshin ortaq eýropalyq salyqtar engizý usynyldy. Olar:
-
elektroqaldyqtarǵa;
-
temeki ónimderine;
-
iri korporatsııalardyń tabysyna salynatyn salyqtar.
Ýrsýla fon der Lıaıenniń aıtýynsha, bul odaqqa qarjylyq derbestik beredi jáne jańa bastamalardy iske asyrýǵa múmkindik ashady.
Budan bólek, qarjy bólý protsesi quqyq ústemdigi qaǵıdatynyń saqtalýymen tikeleı baılanysty bolady. Eýropalyq basylymdardyń jazýynsha, bul ózgeris Vengrııadaǵy demokratııalyq qundylyqtardan aýytqý úrdisine jaýap retinde engizilip otyr.
– Quqyq ústemdigi – basty shart. Biz bólinetin qarajattyń ádil jumsalýyn jáne tolyq eseptilikti qamtamasyz etemiz, – dedi fon der Lıaıen.
Sársenbide ótken tanystyrylym jańa bıýdjetti talqylaý protsesiniń resmı bastamasy bolyp sanalady. Sarapshylar bul kelissózder kúrdeli, uzaq jáne tartysty bolady dep boljaýda. Sebebi árbir el óz múddesin qorǵaýǵa tyrysady.
Aıta keteıik, Eýroparlament Ýrsýla fon der Lıaıenge senimsizdik votýmyn qabyldamady.