Eýro valıýtasynyń negizin qalaýshy, Eýropalyq Odaqtyń sáýletshisi Jak Delor qaıtys boldy

Qazirgi Eýropalyq odaqtyń sáýletshisi atanǵan Eýropalyq komıssııanyń burynǵy tóraǵasy Jak Delor 98 jasynda qaıtys boldy. Kazinform agenttigi bul týraly VVS-ge silteme jasap habarlaıdy. 

Ol Eýropalyq Odaq sheńberinde adamdardyń, taýarlar men qyzmetterdiń erkin qozǵalysyn qamtamasyz etetin biryńǵaı naryqty qurýshylardyń biri boldy.

1985-1995 jyldary Delor eýropalyq birtutas valıýta – eýronyń negizin qalady.

Delor qyzy Martına Obrıdiń habarlaýynsha, ákesi sársenbi kúni tańerteń Parıjdegi úıinde uıyqtap jatqanda qaıtys boldy.

Frantsııa prezıdenti Emmanýel Makron 1981-84 jyldar aralyǵynda Frantsııanyń qarjy mınıstri qyzmetin atqarǵan Delordy «Eýropanyń qajymas qurylysshysy» dep atady.

«Onyń ıdealdarǵa degen adaldyǵy, ádildigi bizdi árqashan shabyttandyrady», - dedi ol.

Jak Delor Eýropalyq Komıssııanyń tóraǵasy bolyp úsh merzim, basqalarǵa qaraǵanda uzaq qyzmet etti.

Qazirgi ýaqytta bul laýazymdy atqaratyn Ýrsýla fon der Lıaıenniń aıtýynsha, ol «Eýropany kúshtirek etken kóregen adam ekenin» ekenin aıtty.

Eýropalyq keńes tóraǵasy Sharl Mıshel ony «tarıhqa Eýropany qurýshylardyń biri retinde engen uly frantsýz jáne eýropalyq uly tulǵa» dep atady.

Delordyń bozbala shaǵy Ekinshi dúnıejúzilik soǵys kezinde ótti, ol Eýropa mundaı apattyń qaıtalanbaýy úshin birigýi kerek dep tereń sendi.

Biryńǵaı naryqty qurý jáne eýrony engizýge daıyndyqpen qatar, onyń Eýrokomıssııaǵa tóraǵalyǵymen EO elderi arasyndaǵy shekaralyq baqylaýdy joıý týraly Shengen kelisimine qol qoıylyp, Erasmus stýdentter almasý baǵdarlamasy iske qosyldy.

1995 jyly qyzmetinen ketkennen keıin Delor saýalnamalarda úlken artyqshylyqpen alda bolǵanyna qaramastan, Frantsııa prezıdenttigine daýysqa túsýden bas tartty.