Eýrazııalyq ıntegratsııa barysynda bilim men ǵylym salasyndaǵy baılanystar nyǵaıdy

NUR-SULTAN. QazAqparat - Eýrazııalyq ıntegratsııa bilim men ǵylym salasyndaǵy baılanystardyń nyǵaıýyna sep boldy. Mundaı pikirdi «Eýrazııalyq ıntegratsııa - N.Nazarbaevtyń tarıhı bastamasy» taqyrybyndaǵy onlaın rejımde ótken telekópir barysynda L.Gýmılev atyndaǵy Eýrazııa ulttyq ýnıversıteti saıasattaný kafedrasynyń meńgerýshisi Indıra Rystına bildirdi, dep habarlaıdy QazAqparat tilshisi.

«Bul ıdeıa bastapqy kezinen-aq memleketterdiń yqpaldasýy, qandaı da bir jobany birlesip júzege asyrý úshin qajetti bastama bolǵan edi. Onyń tarıhı, jalpy jahandaný kezeńindegi mańyzy óte joǵary. Memleketter ózara yntymaqtasyp, bir-birimen qarym-qatynas ornatýda erekshe sharttarǵa basymdyq beretindigi sózsiz. Osy turǵydan alǵanda tek ekonomıkadaǵy ǵana emes sonymen birge qazirgi bilim men ǵylym salasyndaǵy baılanystardyń nyǵaıýy ıntegratsııa jemisi dep aıtýǵa bolady», - dedi ol.

Onyń atap ótýinshe, búginde Qazaqstannyń kóptegen stýdentteri eýrazııalyq ıntegratsııa jemisin kórip otyr. Olar akademııalyq utqyrlyq aıasynda, ózara jasalǵan kelisimsharttardyń arqasynda eýrazııalyq ıntegratsııaǵa kiretin memleketterdiń joǵary oqý oryndarynda bilimderin jetildirýge múmkindik aldy.

«Búgingi sharany uıymdastyrý jaıyna keler bolsaq, basty maqsat eýrazııalyq ıntegratsııany ómirge ákelýdegi Elbasy Nursultan Nazarbaevtyń erekshe bastamalaryna, kóregen saıasatyna basa mán berý ekendigi sózsiz. Búginde osy ıntegratsııanyń arqasynda kóptegen memleketaralyq kelisim sharttar jasalyp, óz tıimdiligin kórsetip otyr», - dedi Indıra Rystına.

Eýrazııa ulttyq ýnıversıteti men M.Lomonosov atyndaǵy MMÝ-diń Qazaqstandaǵy fılıaly birlesip uıymdastyrǵan telekópir barysynda eýrazııalyq ıntegratsııanyń tujyrymdamalyq máseleleri, odaq memleketteriniń bilimi men ekonomıkalyq ósimi arasyndaǵy ózara baılanys, ǵylym men zamanaýı ınnovatsııalyq tehnologııalardy damytý, eýrazııalyq ekonomıka jáne mádenı yntymaqtastyq vektorlary talqylandy.