Eýrazııalyq ekonomıkalyq forýmda ne aıtyldy - sholý
Forýmda Armenııanyń Premer-mınıstri Nıkol Pashınıan, Reseı Prezıdenti Vladımır Pýtın, sondaı-aq Belarýs Premer-mınıstri Aleksandr Golovchenko men Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıch usynystaryn jarııalady.
«Kózbe-kóz kezdesý múmkin bolmasa da, zamanaýı tehnologııalar osyndaı aýqymdy jıyndardy onlaın tártipte ótkizýge jol ashyp otyr. Bizde ótip jatqan forýmǵa eki myńnan astam adam qatysty. Atap aıtqanda, jıynǵa EAEO-ǵa múshe eldermen qatar, alys shetelden de qonaqtar keldi», - dedi S. Japarov.
Sonymen qatar ol bıyl Qyrǵyzstan tóraǵalyq etetin mindetterge kiriskenin eske saldy.
«Osy oraıda bıylǵy mańyzdy mindetterdi júzege asyrý boıynsha basymdyqtardy belgileýge qatysty pikir bildirdim. Bizdiń basty maqsat retinde basty qaǵıdattar saqtalyp otyr, ıaǵnı taýarlar qozǵalysynyń, túrli salada qyzmet kórsetýdiń, kapıtal men eńbek resýrstarynyń erkindigi eskerilgen. Ekinshiden, 2025 jylǵa deıin damý strategııasyn ýaqytyly júzege asyrylýy tıis. Úshinshiden, agroónerkásip pen ónerkásip salalarynda birlesken jumystar bar. Bul turǵyda ımportty almastyrý men EAEO-nyń azyq-túlik qaýipsizdigin qamtamasyz etý maqsatynda naqty kooperatsııalyq jobalardy iske qosý qamtylǵan», - dedi Qyrǵyzstan basshysy.
Sonymen qatar ol turaqty ekonomıkalyq ósimdi qamtamasyz etý baǵytynda damý baǵdarlamasynyń algorıtmderi men tetikterin júzege asyrýdyń mańyzdylyǵyn atap ótti.
S. Japarov «Shyǵys-Batys» jáne «Soltústik-Ońtústik» baǵyttary boıynsha kólik-logıstıka ınfraqurylymyn damytý qadamyna toqtala kele, bul maqsattar álemdik saıasattaǵy qubylmalyqtyń ýshyǵýy jaǵdaıynda asa ózekti bolyp turǵanyn jetkizdi.
«Osy jaǵdaıda bizgesyrtqy qolaısyz faktorlarǵa shuǵyl ári tıimdi áreket etý qajet bolyp tur», - dedi Qyrǵyzstan Prezıdenti.
Qazaqstan Prezıdenti Qasym-Jomart Toqaev óz sózin EEO keńistigindegi ózara saýda-sattyqty arttyrýdyń perspektıvalaryna jáne Eýrazııalyq ekonomıkalyq komıssııanyń jumysyn jetildirýge arnady.
Memleket basshysy Eýrazııalyq ekonomıkalyq odaqtyń ıntegratsııalyq birigý úderisine qatysýshy memleketter arasyndaǵy erkin saýdany damytý maqsatynda tıisti jaǵdaı jasaý úshin qurylǵanyn aıtty.
«Eýrazııalyq ekonomıkalyq odaq kúrdeli geosaıası jaǵdaıda óziniń tıimdiligin kórsetti. Biz muny kórip otyrmyz. Eýropalyq odaqtaǵy jáne basqa da ekonomıkalyq uıymdardaǵy sııaqty bul Odaqta túrli máseleler týyndap otyratynyna tań qalýǵa bolmaıdy. Árbir memleket ulttyq múddesin ózdiginshe kózdeıdi. Árbir memleket týyndaǵan máseleni ózderi durys dep sanaǵan pikiri boıynsha sheshilgenin qalaıdy. Bul árbir halyqaralyq, ásirese saýdamen aınalysatyn uıymdarǵa tán jaǵdaı», – dedi Qazaqstan Prezıdenti.
Sonymen qatar Qasym-Jomart Toqaev Eýrazııalyq ekonomıkalyq komıssııanyń qyzmeti jóninde de aıtty. Onyń pikirinshe, Komıssııa tabysty jumys istep jatyr.
«Búginge deıin Eýrazııalyq ekonomıkalyq komıssııa aıasynda ótkizilgen konsýltatsııalar nátıjesinde kedergilerdiń 80 paıyzy joıyldy. Bul kúrdeli jumys jalǵasyn tabady dep úmittenemiz. Integratsııa – kóp eńbek sińirýdi jáne múshe memleketter arasynda ymyraǵa kelýdi qajet etetin úderis. Qazaqstan Eýrazııalyq ekonomıkalyq komıssııanyń naqty nátıjege jaı sózben emes, naqty ispen qol jetkizgenin qoldaıdy. Kez kelgen máseleni iskerlikpen sheshken jón. Sebebi halyqtarymyz bul máselelerdiń uzaq sozylǵanyn kútpeıdi, qazir sheshilgenin qalaıdy. Olar máseleni sheshýdiń durys joly osy dep sanaıdy», – dedi Memleket basshysy.
Qasym-Jomart Toqaevtyń aıtýynsha, Qazaqstan eýrazııalyq ıntegratsııanyń iskerlik ári pragmatıkalyq negizde damyǵanyn jaqtaıdy.
Óz kezeginde forýmnyń plenarlyq otyrysynda Reseı Prezıdenti Vladımır Pýtın EAEO-nyń sheteldik seriktesterimen yntymaqtastyǵyn belsendi túrde damytý mańyzdy ekenin aıtty.
«Úlken Eýrazııa seriktestigin damytýdyń keshendi strategııasyn qurýdyń ýaqyty jetti. Onda negizgi halyqaralyq syn-qaterler eskerilip, sondaı-aq aldaǵy maqsattardy aıqyndaýy tıis. Bul mindetterge jetýdiń tetikteri de qamtylǵan jón», - dedi V. Pýtın.
RF Prezıdenti saýda ári ınvestıtsııalyq sharttar júıesin damytý boıynsha aldaǵy qadamdardy pysyqtaý kerek ekenin, bul rette ShYU, Ońtústik-Shyǵys Azııa elderi qaýymdastyǵy men BRIKS-ke múshe elderdi qamtýdyń mańyzdylyǵyn atap ótti.
«Úlken Eýrazııa – ol shyn máninde aýqymdy ári órkenıetti joba. Basty ıdeıada óńirlik uıymdar úshin teń quqyly yntymaqtastyqtyń ortaq keńistigin qurý eskerilgen. Úlken Eýrazııa seriktestigi barsha qurlyqta turaqtylyq pen gúldenýdiń kepilgeri bolýǵa laıyqty. Bul óz kezeginde kóbisiniń qyzyǵýshylyǵyn týdyrady dep oılaımyn», - dedi RF Prezıdenti.
Forým barysynda Qazaqstan Prezıdenti Qasym-Jomart Toqaev «Úlken Eýrazııa» mega-jobasyna qatysty pikir bildirdi.
«Vladımır Vladımırovıch Pýtın (Reseı Federatsııasynyń Prezıdenti – avt.) óte qyzyq usynysty aıtyp, ony tıisti túrde tujyrymdap ótti. Bul turǵyda «Úlken Eýrazııa» mega-jobasy eskerilip otyr. Shyn máninde, bul joba tyńǵylyqty zertteý men talqylaýǵa laıyq bolyp tur», - dedi Qasym-Jomart Toqaev.
Osy oraıda Prezıdent aldaǵy ýaqytta bul usynysty júzege asyrýǵa qatysty talqylaý bolýy múmkin ekenin aıtty.
Budan bólek, Armenııa premer-mınıstri Nıkol Pashınıan Eýrazııalyq ekonomıkalyq forýmnyń plenarlyq otyrysynda aqparattyq tehnologııalardy birlese damytýdy usyndy.
«Yntymaqtastyqtyń mańyzdy baǵyty – odaqqa múshe memleketterdiń IT-qoǵamdastyqtarynyń kúsh-jigerin shoǵyrlandyrý, bul ekonomıkanyń joǵary tehnologııalyq sektorlaryn belsendi damytýǵa jáne odaqtyń tsıfrlyq mindetterin tolyqqandy iske asyrýǵa yqpal etedi. Tehnologııalar – ekonomıkada serpilis jasaýdyń bir múmkindigi. Dál osy sala Armenııa úshin strategııalyq mańyzǵa ıe, óıtkeni bul porttardy, teńizge shyǵýdy jáne baı jer qoınaýyn qajet etpeı-aq damytýǵa bolatyn salalardyń biri. Bul úshin adamı kapıtal qajet, al bul resýrspen Armenııa árdaıym erekshelenip keledi», - dedi Nıkol Pashınıan.
Buǵan deıin habarlaǵanymyzdaı, Qasym-Jomart Toqaev resmı saparmen Qyrǵyzstanǵa bardy.
Qyrǵyzstan Prezıdenti «Aq keme» mármár shatyrynda Qasym-Jomart Toqaevty resmı qarsy aldy.
Qazaqstan Prezıdentiniń Qyrǵyzstanǵa sapary barysynda birqatar qujatqa qol qoıyldy.
