Eýrazııa ulttyq ýnıversıtetiniń ókilderi tikeleı efırden 10 saǵat boıy stýdentterdiń saýaldaryna jaýap berdi
NUR-SULTAN. QazAqparat - 2021 jyldyń 15 qańtarynda L.N. Gýmılev atyndaǵy Eýrazııa ulttyq ýnıversıteti áleýmettik jeli arqyly úzilissiz on saǵat tikeleı efır ótkizdi, dep habarlaıdy QazAqparat tilshisi.
Negizgi maqsat – stýdentterge qazirgi oqý protsesiniń barysy men mán-jaıy týraly tolyq aqparat berý.
Tikeleı efırge ýnıversıtettiń 13 fakýltet dekany, akademııalyq máseleler, tsıfrlyq damý, halyqaralyq yntymaqtastyq, qarjy departamentteriniń dırektorlary, sonymen qatar Stýdentter úıi dırektsııasy men ǵylymı kitaphana dırektory, tirkeý ofısiniń basshysy jáne basqa da mamandar qatysty.
Qatysýshylar sanynyń munshalyqty kóp bolýynyń ózindik sebebi bar. Óıtkeni, L.N. Gýmılev atyndaǵy Eýrazııa ulttyq ýnıversıteti Qazaqstandaǵy JOO arasynda alǵash ret uıymdastyryp otyrǵan tikeleı efır QR Bilim jáne ǵylym mınıstrliginiń mamandarymen qatar, elimizdegi kóptegen joǵary oqý oryndarynyń qyzyǵýshylyǵyn týyndatyp otyr.
Tikeleı efırge qatysqan 4000-nan asa stýdent oqý formaty, stýdentter úıinde turý erejeleri, JOO aýmaǵynda qaýipsizdik sharalaryn saqtaý, ýnıversıtettiń birinshi kýrs stýdentterin qabyldaýǵa daıyndyǵy, JOO-da sanıtarlyq normalar men erejelerdi qamtamasyz etý baǵytynda naqty jaýap aldy. Osy oraıda on saǵat ishinde 1200-den astam suraqqa jaýap berildi.
«Elbasy negizin qalaǵan Eýrazııa ýnıversıteti stýdentterdiń kedergisiz oqýǵa kirisýi úshin qajetti jaǵdaılardyń bárin jasaýda. Barlyq jerde sanıtarlyq-epıdemıologııalyq normalar saqtalǵan. Jataqhanada turatyn stýdentter úshin ınternetke kedergisiz qoljetimdilik jáne ýnıversıtettiń kompıýterlik tehnıkasyn paıdalaný múmkindigi qamtamasyz etilgen», - delingen ýnıversıtettiń baspasóz qyzmeti taratqan habarlamada.
Aıta keteıik, L.N. Gýmılev atyndaǵy EUÝ stýdentteri 18 qańtardan bastap ekinshi semestrdi bastaıdy. Qańtar aıynyń sońyna deıin sabaqtar onlaın ótse, 1 aqpannan bastap bakalavrıat, magıstratýra jáne doktorantýranyń birinshi kýrs stýdentteri úshin sabaqtar aralas formatta júrgiziledi. JOO-da dárister onlaın tártipte bolsa, semınarlar, zerthanalyq sabaqtar jáne basqa da praktıkalyq sabaqtar - dástúrli (oflaın) formatta. Al birinshi kýrs stýdentteri úshin jataqhanaǵa ornalasý qańtar aıynyń sońyna deıin jalǵasady.
