Esirtkimen kúres: jyl basynan beri qansha qylmys tirkeldi

ASTANA.KAZINFORM -  Ulttyq qaýipsizdik komıteti esirtki quraldarynyń zańsyz aınalymymen kúres boıynsha jumysty jalǵastyryp jatyr.

Jyl basynan beri esirtki jetkizýdiń 11 halyqaralyq jáne 3 óńirlik arnasynyń joly kesildi, 5 jasyryn zerthananyń qyzmeti zalalsyzdandyryldy.

Shet memleketterdiń quzyretti organdarymen ózara is-qımyl sheńberinde esirtkige qarsy 10 halyqaralyq operatsııa júrgizildi. Nátıjesinde shamamen 240 kg esirtki tárkilendi, onyń ishinde 3,1 kg geroın, 8 kg metamfetamın, 53,5 kg apıyn, 74,2 kg gashısh, 80,9 kg marıhýana jáne 19,3 kg psıhotroptyq zattar, sondaı-aq 3 tonnadan astam prekýrsorlar bar.

Atalǵan quqyq buzýshylyqtardy jasady degen kúdikpen 43 QR azamaty jáne 8 sheteldik ustaldy.

Sotqa deıingi tergep-tekserý júrgizilip jatyr.

Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.

Aıta keteıik, Almatyda eriktilerdiń kómegimen 670 esirtki saıty buǵattaldy.