Esirtki tutynǵan áskerı qyzmetshi aıyppul tóleıdi

 AQTÓBE. KAZINFORM - Aqtóbe garnızony áskerı sotynda 29011 áskerı bólimi jasaqtaý bóliminiń bastyǵy A.Mýrzatovqa qatysty qylmystyq is qaraldy. Ol esirtki tutynyp, ony saqtaǵany úshin aıypty dep tanyldy. 

Aqtóbe garnızony áskerı sotynda 29011 áskerı bóliminiń kelisimshart boıynsha áskerı qyzmetshisi, jasaqtaý bóliminiń bastyǵy A.Mýrzatovqa qatysty qylmystyq is qaraldy.

Oǵan Qylmystyq kodekstiń 296-baby 2-bóligi, ıaǵnı, esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý baby boıynsha aıyp taǵyldy.

Іs materıalyna súıensek, sottalýshy bıyl sáýir aıynda Aqtaý qalasyndaǵy úıiniń aldyndaǵy aýlaǵa shyǵyp, týrnıkke tartylady. Sol kezde polıetılen paketin baıqap, orama ishinen marıhýana taýyp alady. Úıine aparyp, saqtap qoıady. Bir kúnnen soń orap, úıiniń ájethanasynda bir bóligin shegedi. Keıin qalǵan esirtki zatyn ekige bólip, ámııanyna salyp qoıǵan, óz úıinde saqtaǵan.

Áskerı qyzmetshi kóp uzamaı Aqtóbe qalasynda ótetin oqý-jattyǵýǵa jınalyp, Mańǵystaý temirjol vokzalynda kúdikke ilikti. Naqtyraq aıtqanda, qyzmettik ıt esirtki zatyn sezip, belgi berip, janynan ketpeı turyp alǵan. Sottalýshy kúrteshesiniń ishki tós qaltasyna salynǵan ámııanynan marıhýanany shyǵaryp, anyqtaýshyǵa usynǵan.

Sot saraptamasy kezinde eskirtki zatynyń marıhýana ekeni rastaldy. Sot otyrysynda sottalýshy A. Mýrzatov taǵylǵan aıypty tolyǵymen moıyndady.

Sot kabınetindegi málimetke súıensek, sottalýshy A. Mýrzatov Qylmystyq kodekstiń 296-baby 2-bóligimen kináli dep tanylyp, oǵan 35 AEK (137 620 teńge) kóleminde aıyppul salyndy.

Sot úkimi zańdy kúshine engen joq.

Buǵan deıin habarlaǵanymyzdaı, Ulttyq Ulany 6655 áskerı bólimi áskerı polıtsııa qyzmetiniń aǵa anyqtaýshysy Temýr Kasymkýlov «Qorqytyp alý» baby boıynsha sottaldy. Ol eki jylǵa bas bostandyǵynan shekteldi.