Esirtki qylmysyn ashýǵa kómekteskenderdi yntalandyrý josparda bar
ASTANA. KAZINFORM – Qazaqstan aımaqtaryndaǵy esirtki jaǵdaıyna oblystar men respýblıkalyq mańyzy bar qala ákimderi jaýapty bolady.
Bul týraly QR ІІM Esirtki qylmysyna qarsy is-qımyl komıteti tóraǵasynyń orynbasary Qýandyq Áljanov OKQ alańynda ótken baspasóz konferentsııasynda aıtty.
– Dropperlikke jaýapkershilik engizilip, baqylaýdaǵy zattardyń tizimi únemi jańartylyp, tolyqtyrylady. Bas prokýratýra jáne Ulttyq bankpen birlesip qylmystyq aktıvterdiń memleket kirisine aınalý tetikteri, sondaı-aq esirtki qylmysyn áshkereleýge kómektesetin azamattardy yntalandyrý júıesi pysyqtalyp jatyr. Biz vedomstvoaralyq úılestirýdi arttyramyz, aldyn alý jónindegi keńesterdiń jumysyn súıemeldeımiz jáne prekýrsorlardyń aınalymyn baqylaý qaǵıdalaryn ázirledik. Parlamentte «Quqyq buzýshylyqtyń aldyn alý týraly» zań jobasy qaralyp jatyr, - dedi Q.Áljanov.
Ol esirtki bıznesine qarsy kúrestiń 2026-2028 jyldarǵa arnalǵan keshendi jospary ázirlenip jatqanyn aıtty.
Máseleni túbegeıli pysyqtaý úshin joba Qazaqstan Prezıdenti janyndaǵy Jastar saıasaty keńesiniń qaraýyna birneshe ret usynyldy. Premer-Mınıstr tóraǵalyǵymen nashaqorlyqtyń aldyn alý jáne esirtkige baılanysty qylmysqa qarsy is-qımyl jónindegi respýblıkalyq shtabtyń birinshi otyrysy ótti. Otyrys qorytyndysy boıynsha shtabtyń 2026 jylǵa arnalǵan jumys jospary bekitilip, naqty mindetter belgilendi. Óńirlerdegi esirtki jaǵdaıyna endi oblystar men respýblıkalyq mańyzy bar qalalardyń ákimderi jaýapty bolady. Halyqaralyq yntymaqtastyq aıasynda TMD formatynda kezdesýler uıymdastyryldy.
Halyqaralyq yntymaqtastyq sheńberinde Qazaqstan TMD elderimen ózara is-qımyldy kúsheıtedi. Búginde 54 vedomstvoaralyq tergeý toby qurylyp, 2,6 mlrd teńgeniń múlki men aktıvi tárkilendi.
Bıyl 9 aıda 12 zerthana joıylyp, 26 tonnadan astam túrli esirtki tárkilengenin jazǵan bolatynbyz.