Eski kólikterge salynatyn salyq tómendetiledi
ASTANA. KAZINFORM – Eski kólikterge salynatyn salyq tómendetiledi. Bul týraly búgin Májiliste jańa Salyq kodeksiniń jobasyn tanystyrǵan Ulttyq ekonomıka vıtse-mınıstri Azamat Ámrın aıtty.
«Memleket basshysynyń tapsyrmalaryn oryndaýmen qatar, qoǵam jıi kóteretin máseleler sheshiledi. Máselen, jańa Salyq kodeksinde Biryńǵaı jınaqtaýshy zeınetaqy qorynan zeınetaqy tólemderin jeke tabys salyǵynan bosatý jónindegi norma kózdelgen. Sondaı-aq, qoldanýy 10 jyldan asqan avtomobılder úshin salyq somasy 30 paıyzǵa, 20 jyldan asqan avtomobılder úshin 50 paıyzǵa tómendetiletin bolady», - dedi Azamat Ámrın.
Sonymen qatar onyń dereginshe, «sán-saltanat» zattaryna joǵary salyq salý jónindegi mindetterdi iske asyrý úshin mynalar usynylady:
- jıyntyq quny 450 mln teńgeden asatyn jyljymaıtyn múlik obektileri boıynsha múlik salyǵynyń joǵary mólsherlemesi;
- kedendik quny 75 mln teńgeden asatyn jeńil avtomobılderge aktsızben qosymsha salyq salý;
- qymbat alkogol jáne temeki ónimderine, sondaı-aq qymbat teńiz kemelerine, ushý apparattaryna aktsızben qosymsha salyq salý.
Osyǵan deıin Úkimettiń 1,3 trln teńgeden astam somaǵa 110 salyqtyq jeńildikti alyp tastaǵaly otyrǵanyn jazdyq.