Eski Qalqutan aýylynda sý deńgeıi tómendep keledi
ASTANA. KAZINFORM – Aqmola oblysynyń ákimi Marat Ahmetjanov sý tasqyny qaýpi joǵary aımaqtardy aralaý barysynda Astrahan aýdanyndaǵy Eski Qalqutan aýylyna baryp, aýyl turǵyndarymen kezdesip, azyq-túlik dúkenderin tekserdi.
Eski Qalqutan aýyly birneshe ózen aǵysy qosylatyn jerde ornalasqan, olar Býrabaı, Sandyqtaý, Arshaly, Shortandy jáne Bulandy aýdandarynan keledi. Bıylǵy jyly sý tasqynynyń kólemi ótken jylǵy kórsetkishten 1,5 esege artty. Saldarynan aýyldyń tómengi bóliginde ornalasqan jeke menshik úılerdiń aýlasy sý astynda qaldy.
Joldardyń shaıylýyna baılanysty aýylmen qatynas ýaqytsha shekteldi.
Degenmen aımaq basshysynyń aıtýynsha turǵyndarǵa qajetti barlyq shara qabyldanǵan.
— Aýylda posttar ornatylyp, qaıyqpen qatynas uıymdastyryldy. Eldi mekende azyq-túlik, dári-dármek jáne eń qajetti zattardyń jetkilikti qory bar. Medıtsınalyq kómekke muqtaj turǵyndar, onyń ishinde júkti áıelder, qaýipsiz aımaqtarǵa ýaqytyly evakýatsııalandy. Búgingi tańda sý deńgeıi tómendep, 20 santımetrge azaıdy. Biz jaǵdaıdyń apta sońyna deıin turaqtalýyn kútemiz, — dep atap ótti Marat Ahmetjanov.
Óńir basshysynyń aıtýynsha, barlyq kúsh-jiger halyqtyń qaýipsizdigin qamtamasyz etýge jáne bolashaqta týyndaýy múmkin qaýipterdiń aldyn alýǵa baǵyttalǵan. Sý basqan úılerdiń turǵyndaryna kómek kórsetiletin bolady.
Ótken jyly aýylda Kolýton ózeniniń arnasyn keńeıtý jáne tereńdetý jumystary bastalǵan. Qazirgi tańda 3,5 km qashyqtyqta jumystar júrgizildi. Ózenniń tereńdigi 4 metrge deıin, al eni 18-den 36 metrge deıin keńeıtildi.
Aýylda oblys ákimi ǵalymdar, gıdrologtarmen kezdesti. Olardyń aıtýynsha, salynǵan aınalma arna Eski Qalqutan aýylyna keletin sý kólemin aıtarlyqtaı azaıtýǵa septigin tıgizgen. Bul aýyldyń turǵyn úıleriniń úlken sý basýdan aman qalýyna septigin tıgizdi. Sonymen qatar, gıdrologııa jáne gıdrotehnıkalyq qurylymdar salasynyń doktory, EUÝ professory Sherim Túlegenov óńirdegi ózenderdiń qozǵalysyn keshendi zertteý jumystaryn júrgizýdi usyndy.
— Jaǵdaı qıyn boldy, sý bıyl ótken jylǵa qaraǵanda áldeqaıda kóp keldi, biraq alǵashqy kúnderden bastap biz qoldaý sezindik. Bizge azyq-túlik pen qajetti zattardy jetkizip, barlyq aqparatty ýaqytynda berdi. Eger aınalma arna bolmasa, barlyq aýyl sý astynda qalar edi, — dedi aýyl turǵyny Saıran Eseeva.
— Ákimdik ýaqytynda eskertý jasady, barlyǵymyzǵa eskertýler taratylyp, jıhazymyzdy kóterip, malymyzdy evakýatsııalaýǵa kómektesti, — dedi Sergeı Selıvano.
Sý tasqynynyń zardaptaryn joıý jumystary jalǵasýda. Qutqarý qyzmetteri, kommýnaldyq kásiporyndar men jergilikti atqarýshy organdar táýlik boıy jumys istep jatyr.
Aıta ketelik Aqmolanyń Eski Qalqutan aýylynda kólik qatynasy úzilgeni týraly jazǵan edik.