Esirtkisiz Elorda: Astanada stýdentter arasynda basketboldan týrnır ótti
ASTANA. KAZINFORM — Elordada «Zań jáne tártip» qaǵıdaty aıasynda stýdentter arasynda 3×3 formatynda basketboldan fınaldyq týrnır uıymdastyryldy, dep habarlaıdy qala ákimdiginiń resmı saıty.
Týrnır Nazarbaev Ýnıversıtetiniń alańynda ótti.
Іs-sharany Astana qalasy ákimdiginiń «Astana jastary» jastar resýrstyq ortalyǵy Astana polıtsııa departamentiniń Esirtki qylmysyna qarsy is-qımyl basqarmasynyń qoldaýymen uıymdastyrdy.
— Antınarkotıkalyq joba aıasyndaǵy mundaı sporttyq is-sharalar turaqty túrde ótkizilip keledi. Onyń basty maqsaty — jastar arasynda nashaqorlyqtyń aldyn alý. Biz bul baǵyttaǵy jumysty mektep oqýshylary, kolledj stýdentteri arasynda júrgizip kelemiz. Al búgin stýdentterge arnap uıymdastyrdyq. Tek 2025 jyldyń basynan beri elordada esirtki aınalymyna baılanysty 400-den astam qylmystyq is tirkeldi, sonyń 270-ten astamy — esirtkini taratý faktileri, — dedi Astana PD Esirtki qylmysyna qarsy is-qımyl basqarmasynyń asa mańyzdy ister jónindegi aǵa jedel ýákili Álııa Qıbatqyzy.
Týrnırde tórt myqty stýdenttik komanda baq synady. Shamamen 800 kórermen — jankúıerler, belsendiler jáne jastar uıymdary jarysty tamashalady.
Nazarbaev Ýnıversıtetinde ótken strıtboldyń fınaldyq týrnıri jastardy salaýatty ómir saltyna tartýdyń qaýipsiz ári ońtaıly formaty bolyp sanalady. Ol maýsymnyń sporttyq qorytyndysy ǵana emes, sonymen birge jastardy esirtki qaterinen qorǵaýǵa baǵyttalǵan qalalyq profılaktıkalyq júıeniń bir bóligine aınalyp otyr.
Budan buryn Astanada STEM-olımpıadasyna 7 elden 250-den asa adam qatysyp jatqanyn jazǵan edik.