Esirtkige elitigen kúıinde kólik urlaǵan kúdikti Aqtóbede ustaldy

AQTÓBE. QazAqparat - Oral qalasynan kólik urlap, Aqtóbege kelgen kúdiktini polıtsııa qyzmetkerleri ustady. Onyń esirtki tutynǵan kúıde rýlge otyrǵany belgili boldy, dep habarlaıdy QazAqparat tilshisi.

Oqıǵa 6 tamyz kúni tirkeldi. «Samara-Shymkent» tasjolynda kezekshilik etken Aqtóbe oblysy PD patrýldik polıtsııa rotasynyń qyzmetkerleri Oraldaǵy áriptesterinen habarlama aldy. Habarlamada BQO-da «Toyota Estima» avtokóliginiń urlanǵany jáne Aqtóbege qaraı bet alǵany týraly aıtylǵan.

«Polıtseıler atalǵan kólikti tas jolda baıqap, kóp uzamaı toqtatty. Kólikti 39 jastaǵy júrgizýshi basqarǵan. Onyń jaǵdaıy kúdik týdyryp, saraptama júrgizildi. Er adamnyń esirtki paıdalanyp, rýlge otyrǵany belgili boldy. Ákimshilik hattama toltyrylǵannan keıin kúdikti men avtokólik BQO PD polıtsııa qyzmetkerlerine tapsyryldy»,- dep habarlady oblystyq PD baspasóz qyzmetiniń jetekshisi Erbolat Sarqulov.