«Esirtki aınalymy endi ǵaryshtan baqylanady» - baspasózge sholý
«Qazǵarysh» Baıqońyrdaǵy ekologııalyq ahýaldy qadaǵalaýǵa zań júzinde jaýapty bolyp bekitiledi. Bul týraly «Aıqyn» basylymynyń «Esirtki aınalymy endi ǵaryshtan baqylanady» atty maqalasynda xabarlanyp otyr.
Gazettiń jazýynsha, mundaı jaýapkershilik «ǵarysh qyzmeti máseleleri týraly» jańa zań jobasynda qarastyrylǵan. Jobaǵa sáıkes, Investıtsııalar jáne damý mınıstrliginiń Aeroǵarysh komıtetine («Qazǵarysh») «Baıqońyr» kosmodromynan zymyran ushyrýlardyń qorshaǵan ortaǵa yqpalyna monıtorıng júrgizý boıynsha zańnama júzinde quzyret beriletin bolady.
- Shynyn aıtqanda, zymyran-tasyǵyshtardy ushyrǵan kezdegi «Baıqońyr» ǵarysh aılaǵy qyzmetiniń qorshaǵan ortaǵa belgili bir yqpaly bar. Birinshiden, aýaǵa ýly zattar shyǵarylady. Buǵan qosa, apatty jaǵdaılarda da ýly zattar tógilýi yqtımal. Sol sebepti ýákiletti organ kosmodromnyń tabıǵatqa yqpalyna bizdiń «Qazǵarysh» monıtorıng júrgizýi kerektiginde tabandap otyr, - dedi Aeroǵarysh komıteti tóraǵasynyń orynbasary Meıirbek Moldabekov.
Onyń aıtýynsha, qazirgi kezde «Qazǵarysh» onsyz da osy qyzmetpen aınalysyp júr. Biraq shyn máninde, bul ókilettikter qorshaǵan ortany qorǵaý salasyndaǵy memlekettik organǵa bekitilgen. Nátıjesinde qulaǵan zymyrannan tabıǵatqa qandaı zııan kelgeni týraly jýrnalıster suraı qalsa, «Qazǵarysh» basshylary solarǵa silteıdi. ıAǵnı sala «sen salar da, men salar» kúıde. Jaýap beretin jan tabylmaıdy.
- Biz tipti muny suraǵan da joqpyz, - dedi «Qazǵarysh» ókili. - Zańdy ázirleýshiler osy fýnktsııalardy bizge tapsyrýdy oryndy dep taýypty. Bul jumysty onsyz da iske asyryp júrgendikten, biz qarsy bolmadyq, ony oryndaý jaýapkershiligin óz moınymyzǵa alatynymyzdy aıttyq.
Meıirbek Moldabekovtiń túsindirýinshe, bul sheshimde qısyn bar: birinshiden, zymyrannyń qulaýynan keletin zııandy anyqtaýdyń ózindik erekshelikteri kóp. Ekinshiden, bul mindet Reseıdiń ǵarysh agenttigimen birlestikte oryndalady, al onymen «Qazǵarysh» tikeleı jumys jasaıtyny belgili.
«Parlamentke engizilgen jańa zańnyń taǵy bir jańalyǵy atap ótildi. Onyń arqasynda Qazaqstanda esirtki aınalymyna ǵaryshtan baqylaý júrgiziletin bolady. Taıaýda ushyrylǵan «Jerdi qashyqtyqtan zondtaý» otandyq spýtnıgin osy maqsatqa paıdalaný zańdastyrylǵaly otyr», - delinedi atalǵan materıalda.
«Aıqyn » gazeti óziniń kelesi maqalasynda Qazaqstanda adam quqyǵy qanshalyqty saqtalyp otyr? Syrt tarap synaıtyndaı sonshalyqty tómen be, álde jyl ótken saıyn jaqsaryp kele me? Qoǵamda qanshalyqty erkindik pen sóz bostandyǵy bar? Bul turǵyda damyǵan memleketter qoıatyn talaptardyń bıiginen tabylyp júrmiz be? degen saýaldardyń tóńireginde oı órbitedi.
«Demokratııa» degen taqyryp qozǵala qalsa, jıi-jıi qaıtalanatyn saýaldardyń birqataryna jaýap beretin «Qazaqstan Respýblıkasyndaǵy adam quqyqtarynyń ahýaly týraly» arnaıy baıandamanyń tusaýkeseri keshe Astanada uıymdastyryldy», - dep jazylady «Quqyǵyńyz qorǵalyp júr me? » atty maqalada.
«Prezıdent janyndaǵy Adam quqyqtary jónindegi komıssııanyń tóraǵasy Qýanysh Sultanov qysqasha tanystyrǵan baıandamada qazirgi qoǵamdaǵy ahýaldy sıpattaıtyn birqatar mańyzdy derekter kórsetilgen. Mańyzdy salalardaǵy quqyqbuzýshylyq pen ony túzetýge qatysty bılik oryndarynyń áreketi keltirilgen maǵlumatta mán beretin tustar jeterlik. Atap aıtqanda, beıbit jınalystar quqyǵyn iske asyrý týraly bólimde 2012 - 2014 jyldar aralyǵynda respýblıkamyzda ár túrli 497 aktsııa tirkelipti. Alaıda olardyń 324-i ruqsat etilmegen jıyndar bolyp tabylady. Munyń 122-i - Astanada, 157-si Almatyda jáne 87-si Shyǵys Qazaqstanda oryn alǵan. Atalǵan sharalarǵa QR Іshki ister mınıstrliginiń málimetine sáıkes, 190 myń adam qatysypty. Sarapshylar ruqsatsyz aktsııalarǵa negizinen, halyqtyń bir tobynyń áleýmettik jaıyna kóńil tolmaýy, sot sheshimderine kelispeý, jalaqyny ýaqtyly tólemeý, ıpotekalyq úleskerler narazylyǵy sebepshi bolǵan dep sanaıdy. Árıne, zańsyz aktsııany uıymdastyrýshylardyń birqatary jaýapkershilikke tartylǵan. Endi komıssııa beıbit mıntıngiler men sherýler ótkizý týraly zańǵa ózgerister engizýdi, bolmasa múlde jańa zań qabyldaý kerektigin usynyp otyr», - delingen atalmysh materıalda.
***
«Egemen Qazaqstan » basylymy keshe Astanada ótken TMD-ǵa qatysýshy elderdiń shyǵarmashylyq jáne zııaly qaýym ókilderiniń forýmy jaıynda qalam terbeıdi.
«Bıylǵy mereıtoılyq H forým keshe Astana qalasyndaǵy Ulttyq murajaıda ashyldy. Oǵan Dostastyq elderinen 200-ge jýyq delegat qatysty. Forýmnyń taqyryby - «Dostastyqtyń gýmanıtarlyq keńistigi: ortaq qundylyqtar men mádenıetter únqatysýy» dep ataldy. Sonymen qatar, forýmda «Bilim jyly» bolyp belgilengen 2016 jyldy qalaı birlesip ótkizý máseleleri talqylandy», - delingen «Jandanǵan jarasymdylyq joly » atty maqalada.
«Forým jumysyn Qazaqstan Respýblıkasynyń Mádenıet jáne sport mınıstri Arystanbek Muhamedıuly ashty. Odan ári forým jumysy týraly «Mır» telekompanııasy túsirgen shaǵyn derekti fılm kórsetildi. Onda burynǵy bolǵan forýmdardyń qaı elde, qaı ýaqytta ótkeni jáne qarastyrǵan taqyryptary týraly aıtyldy. Sonyń ishinde Memleketaralyq gýmanıtarlyq yntymaqtastyq qory (MGYQ) mádenıet, bilim, sport jáne ǵylym salalary boıynsha 470 memleketaralyq jobany qoldaǵany kóldeneń tartyldy. Oǵan TMD-nyń barlyq elderinen, sonymen qatar, Grýzııa jáne Baltyq boıy elderinen barlyǵy 270 myńnan artyq adam tartylǵan. Sonymen qatar, qor memleketaralyq baǵdarlamalardyń bastamashysy da bolǵan, máselen, 2015 jyldy «Ardagerler jyly» dep belgileý ıdeıasy osy qordan shyqqan. Sondaı-aq, osy jylǵa «TMD-nyń mádenı astanasy» dep Reseıdiń Voronej jáne Tájikstannyń Kýlıab qalalaryn belgileý de osy qordyń usynysymen júzege asqan», - delinedi maqalada.
***
Astananyń bilim basqarmasy «Nestle Fýd Qazaqstan» kompanııasymen birge bastaýysh synyp oqýshylary arasynda tamaqtaný mádenıetin qalyptastyrý maqsatynda «Salaýatty tamaqtaný mektebi» atty áleýmettik aǵartý jobasyn bastady, dep jazady «Ekspress K » gazeti "Shkola zdorovogo pıtanııa» atty maqalasynda.
«Durys tamaqtanýdyń rólin eskere otyryp, «Nestle» 2009 jyly Healthy Kids («Deni saý balalar») atty jahandyq baǵdarlamany bastaǵan bolatyn. Onyń eń basty maqsaty óskeleń urpaqty tamaqtaný mádenıetine daǵdylaý. 2014 jyly jobaǵa barsha álem boıynsha 73 el men 7 mıllıonnan astam bala qatysty», - deıdi basylym.
Gazettiń jazýynsha, «Salaýatty tamaqtaný mektebi» atty biregeı aǵartý baǵdarlamasy Almatyda 2014 jyly júzege asyryla bastady jáne memlekettik organdardyń, sarapshylardyń, muǵalimderdiń, oqýshylar men olardyń ata-analarynyń joǵary baǵasyna ıe boldy.
«Byltyr arnaıy qurylǵan jeńildik arqyly jobaǵa Almatynyń 20 mektebi men 4000 bala qatysty. 2015 jyly bul baǵdarlamaǵa Astana qalasy bilim basqarmasynyń qoldaýymen elordanyń 20 mektebi qosylyp otyr. 2015/2016 oqý jylynda Osy jobaǵa Astana men Almaty qalalarynan 40 mektep pen 8000 astam bala qatysa alady degen sóz», - delingen maqalada.
