Esik ashqandardy óltirip, tonap ketedi: Manıak týraly aqparat – feık

ASTANA. QazAqparat – Qazaqstandyqtar áleýmettik jelide páterlerdi aralap, arzan ydys-aıaq satyp alýdy usynyp, esik ashqan adamdardy óltirip, tonap ketip jatqan qaraqshy-manıak týraly eskertilip jatyr. Aqparattyń ras-ótirigin Stopfake.kz anyqtady.

«Mátini osyndaı, biraq sýreti basqa aqparat 2016 jyly saıttar men forýmdarda jarııalanǵan bolatyn. Ol kezde manıak týraly eskertý Bashqurtstanda taraǵan edi. Ol ótirik bolyp shyqty, bul týraly reseılik BAQ-tar da jazdy.
Al dál búgingideı habarlama 2018 jyldyń basynda shyqqan. Ol kezde tonap, óltirip ketetin adam týraly Hromtaý turǵyndaryna eskertildi. Bul aqparat basqa qalalardyń turǵyndary arasynda da taraı bastady.
2020 jyldyń aqpanynda habarlama Ýkraınada tarady, biraq ol tez arada joqqa shyǵaryldy», -delingen Stopfake.kz saıtynda.
Málim bolǵandaı, mundaı manıaktyń bar ekendigi týraly fakti ne Qazaqstanda, ne Reseıde, ne Ýkraınada rastalmady.

«Sondaı-aq onyń birde-bir «qurbany» anyqtalmady. Qoryta aıtqanda, aqparat – segiz jyl buryn Jelide taraǵan – feık», - dep túıindelgen saıtta.